(၁)
သူမ... ကျွန်မလောက် ရုပ်မချောဘူး။
ကျွန်မထက် ပညာအဆင့်အတန်း မမြင့်ဘူး။
ဒါပေမယ့် ချစ်သူက ကျွန်မနဲ့သူမကြားမှာ ၂နှစ်ကြာလောက် လူးလားခေါက်ပြန် ကူးချည်သန်းချည် ပြုခဲ့တယ်။ တစ်နေ့မှာ ကျွန်မဆီ သူမရောက်လာပြီး နေရာလာလုခဲ့တယ်။ အဲဒီတခဏ ကျွန်မရဲ့နှလုံးသားတွေ သေလုလုဖြစ်ခဲ့တယ်။ နောက်ဆုံးမှာ ချစ်သူက ကျွန်မကို အတင်းအဓမ္မ တောင်းပန်ပြီး သူမရဲ့ဖြားယောင်းသွေးဆောင်မှုကို သူခံခဲ့ရကြောင်း၊ နောက်ပိုင်း ဘယ်လိုခွါခွါ ခွါမရခဲ့ကြောင်း ရှင်းပြတယ်။
ဒီကမ္ဘာပေါ်မှာ ဒီလိုမျိုးမိန်းမတွေ ရှိတတ်မှန်း ကျွန်မယုံကြည်တယ်။ အမှားကြောင့် စိတ်ပြန်လည်လာတဲ့ ချစ်သူကို ကျွန်မရွေးချယ်ခဲ့ပါတယ်။ သူ့စိတ်က အမြဲတမ်းကျွန်မဆီမှာပဲ ရှိကောင်းရှိပါလိမ့်မယ်။ ယောက်ျားအများ ကျူးလွန်တတ်တဲ့ အမှားတစ်ခုကို သူကျူးလွန်မိချိန် ကျွန်မသာ သူ့ကိုလက်လွတ်ခဲ့မယ်ဆိုရင် ဒီတစ်သက် ကျွန်မနောင်တရလို့ ဆုံးတော့မှာ မဟုတ်ဘူး။ ဘာဖြစ်လို့လဲဆိုတော့ အဲဒီပြဿနာ ဖြေရှင်းပြီးနောက် ကျွန်မကို သူပိုချစ်၊ ပိုဂရုစိုက်လာခဲ့လို့ပါပဲ။ တစ်ခါတလေမှာ နောက်ဆုတ်ခဲ့တဲ့ ခြေလှမ်းလေးတစ်လှမ်းက ရှေ့တိုးဖို့ ခြေလှမ်းကြီးတစ်လှမ်း ဖြစ်ခဲ့တယ်။
(၂)
သူနဲ့ကျွန်မ အိမ်ထောင်သက် (၈)နှစ်ရှိခဲ့ပါပြီ။ အိမ်ထောင်သက် (၆)နှစ်ခွဲမှာ မပြေလည်မှုက ကျွန်မဘက် ခြေဦးလှည့်လာခဲ့တယ်။ ရုပ်ဖြောင့်တဲ့ ကျွန်မခင်ပွန်းဘေးမှာ ရုပ်စုံ၊ ရောင်စုံ မိန်းကလေးတွေ ဝိုင်းဝိုင်းလည်နေတာ ကျွန်မအတွက် မထူးဆန်းတော့ပါဘူး။ ဒါပေမယ့် သူမက ကျွန်မခင်ပွန်းကို ကောင်းကောင်းချုပ်ကိုင်နိုင်ခဲ့တယ်။ ကျွန်မအပေါ်ဆက်ဆံတဲ့ ခင်ပွန်းရဲ့အပြုအမှုတွေ တဖြေးဖြေး အေးစက်လာခဲ့တယ်။ ကျွန်မနှလုံးသားကို နာကျင်စေခဲ့တယ်။ ခင်ပွန်းကို ဒီအကြောင်း အလျှင်စလို ကျွန်မဘက်က စပြီးမမေးရဲခဲ့ဘူး။ အိပ်ဆေးအကူနဲ့ ကျွန်မအိပ်ခဲ့ရတဲ့ညတွေ မရေမတွက်နိုင်ခဲ့ဘူး။ စိတ်ဓာတ်တွေ၊ မျှော်လင့်ချက်တွေ အကုန်လုံး လဲပြိုခဲ့ရတယ်။
တစ်နေ့မှာ ကလေးကစားစရာတွေ တပွေ့တစ်ပိုက်နဲ့ ရုတ်တရက် ခင်ပွန်းပြန်ရောက်လာခဲ့ပြီး ကျွန်မကို သူနဲ့သူမအကြောင်း ပွင့်ပွင့်လင်းလင်း ပြောပြလာခဲ့တယ်။ ခွင့်လွှတ်ခြင်းကို ကျွန်မရွေးချယ်ခဲ့ပါတယ်။ ဒါဟာ ကျွန်မလိုချင်တဲ့ နောက်ဆုံးဇာတ်သိမ်းပဲဖြစ်ပါတယ်။ ဘာဖြစ်လို့လဲဆိုတော့ သူမက သူ့ထက်ချမ်းသာတဲ့လူကို ရွေးသွားခဲ့လို့ဖြစ်တယ်။ ကျွန်မရှေ့မှာ ကလေးတစ်ယောက်လို သူငိုကြွေးခဲ့တယ်။ သူ့ကြောင့် ကျွန်မရဲ့နှလုံးသား အစိပ်စိပ်အမွှာမွှာ ကွဲအက်ခဲ့ရသလို သူလည်းတစ်ခြားလူကြောင့် ထိခိုက်ဒဏ်ရာ ရခဲ့ပြီမဟုတ်လား...!
တစ်ခါတလေ သူမကို သူသတိရနေတတ်မယ်ဆိုတာ ကျွန်မသိတယ်။ ဒါပေမယ့် ဒီအတွက် သူသင်ခန်းစာ ကောင်းကောင်းရခဲ့လို့ သူ့ကိုဆက်ပြီး ကျွန်မအပြစ်မဆိုခဲ့တော့ဘူး။ တစ်ဘက်လူက အလံဖြူပြ အရင်နုတ်ထွက်ခဲ့ပေမယ့် ဒီအိမ်ထောင်ရေးစစ်ပွဲမှာ ကျွန်မအနိုင်ရခဲ့ပြီဆိုတာကို ကျွန်မကောင်းကောင်း နားလည်လိုက်တယ်။ ခွင့်လွှတ်ခြင်းကို ကျွန်မရွေးချယ်ခဲ့ပြီလေ.......
(၃)
သူဘီးချော်နေပြီဆိုတာကို သူ့ကွန်ပြူတာ ချက်ရွန်းထဲကတစ်ဆင့် ကျွန်မသိခဲ့ရတယ်။ ချက်ရွန်းထဲက ကောင်မလေးတစ်ယောက်နဲ့ သူချစ်နေတာ (၁)နှစ်ကျော်ကြာခဲ့ပြီ။ ကျွန်မ ခံစားခဲ့ရတယ်၊ နာကျင်ခဲ့ရတယ်။ ဘဝထဲက တကယ်လက်တွေ့ အချစ်တစ်ခုက စိတ်ကူးယဉ်ကမ္ဘာ အင်တာနက်ထဲက အချစ်လောက် ဘာကြောင့် မလေးနက်ခဲ့သလဲဆိုတာကို ကျွန်မနားမလည်နိုင်ခဲ့ဘူး။ ဒါပေမယ့် နာကျင်ခြင်းက ကျွန်မကိုလှုပ်နိုးခဲ့ပါတယ်။ အင်တာနက်အချစ်က အင်တာနက်ပေါ်မှာပဲရှိခဲ့တယ်။ သူ့ဘေးမှာ တကယ်ရှိနေတာက ကျွန်မမို့ ဆင်ခြေတွေပေးပြီး သူ့ကိုကျွန်မ လက်မလွတ်ခဲ့မိဘူး။ ခွင့်လွှတ်ခြင်းကို ကျွန်မရွေးချယ်ခဲ့ပါတယ်။
အချစ်နဲ့အချစ်ကြားမှာ သဲတစ်ပွင့်တောင် အဝင်မခံဘူးတဲ့...
အချစ်ထဲက ယောက်ျားနဲ့မိန်းမတို့ဟာ သာမန်လူတွေပါ။ သာမန်လူတွေ အမှားလုပ်ရင် နောင်တရပြင်ဆင်နိုင်တဲ့ အခွင့်အရေးတစ်ခုတော့ ရှိသင့်သတဲ့။ နောင်တရ၊ စိတ်ပြန်လည်လာသူကို သင်လက်လွတ်မလား? ပြုပြင်ဖို့ အခွင့်အရေး ပေးမလား?
မူရင်း... လန်ဒန်ထုတ် တရုတ်သတင်းစာ lgtes.com မှ
နိုင်းနိုင်းစနေ ဘာသာပြန်သည်။
No comments:
Post a Comment