မတူထူးခြား ဓလေ့များ - ၁

ဘ၀ဆိုတာ ကိုယ်ဖြစ်ချင်တာ ဖြစ်ဖို့ထက် ဖြစ်သင့်တာကို ဖြစ်အောင်လုပ်ဖို့ အမြဲလို ဖိအားပေးခံရလေ့ရှိပါတယ်။ “ပျော်ရမှာ မနေရ၊ တော်ရာမှာ နေရ”ဆိုတဲ့ စကားဟာလည်း အဲဒီအထဲက တစ်ခုဖြစ်ပါတယ်။ အများစုကတော့ တော်ရာမှာနေပြီး ပျော်အောင်နေကြရသူတွေပါ။ 

ဓမ္မနိယာမ-အရဆိုရင် လောကမှာ သက်ရှိပဲဖြစ်ဖြစ် သက်မဲ့ပဲဖြစ်ဖြစ် တစ်စုံတစ်ခု အကျိုးဖြစ်လာဖို့အတွက် အကြောင်းများစွာ ရှိရပါတယ်။ အထင်ရှားဆုံးလည်းဖြစ် အနီးကပ်ဆုံးလည်းဖြစ်တဲ့ အကြောင်းတစ်ခုကိုသာ ဆွဲကိုင်လေ့ရှိကြလို့ အကြောင်းတစ်ခုတည်းလို့ ထင်ရတာပါ။ ဒါကလည်း လောကသဘာဝအရတော့ မှန်နေပါတယ်။ ဘာဖြစ်လို့လဲဆိုတော့ အကြောင်းတရားအားလုံးကိုသိဖို့ အမြဲတမ်းလိုအပ်နေတာ မဟုတ်ပါဘူး။ ထမင်းတစ်နပ်စားရဖို့ ဆန်ဘယ်လိုချက် စပါးဘယ်လိုဖြစ်ရတယ်ဆိုတာ လူတိုင်းသိနေဖို့ မလိုပါဘူး။ 

တောင်စဉ်ရေမရတွေ မီးခိုးမဆုံး မိုးမဆုံးတွေ ပြောနေဖို့ အချိန်ရလောက်အောင် အကြောင်းတွေ ပေးနေလောက်အောင် အချိန်မရပါဘူး။ ဘ၀ဆိုတာ တိုတိုလေးလေးပါ။
လွန်ခဲ့တဲ့ ငါးနှစ်ခန့် ၂၀၁၀-တုန်းက သီရိလင်္ကာကို ရောက်လာခဲ့တယ်။ အကြောင်းများစွာ ရှိနေပေမယ့် အဓိကအကြောင်းကတော့ ပညာရေး ဆက်လက်လေ့လာဖို့ပါ။ ပတ်ဝန်းကျင်သစ် နေရာသစ်မှာ လွယ်လွယ်ကူကူ သတိထားမိစရာတွေ များတတ်တာ သဘာဝပါ။ ပိုပြီး သိသာတာက ယဉ်ကျေးမှုတွေ ဓလေ့ထုံးစံတွေ အစဉ်လာတွေပါ။ မြန်မာနဲ့ သီရိလင်္ကာဆိုတာ လက်ချိုးရေးရင်တောင် လက်ဆယ်ချောင်း မပြည့်တတ်တဲ့ ထေရ၀ါဒ ဗုဒ္ဓဘာသာကို ကိုးကွယ်ကြတဲ့ အစဉ်လာတူ နိုင်ငံတွေပါ။ 

ရှေးပဝေသဏီကစလို့ ဘာသာတရားနဲ့ ပတ်သက်ပြီး နှစ်နိုင်ငံ အလေးအမြတ်ထားခဲ့ကြတာ ထူးခြားတဲ့ သမိုင်းမှတ်တိုင်ပါ။ အပြန်အလှန် ယုံကြည်မှုတွေဟာလည်း ဘာသာတရားကြောင့် ပေါ်ပေါက်ခဲ့ရတယ်ဆိုရင် လွန်တယ်လို့ မထင်ပါဘူး။ ကနေ့ခေတ်အထိ နွေးထွေးနေတယ်ဆိုတာတော့ ပြောမယုံ ကြုံဖူးမှပဲ တကယ်သိကြမှာပါ။
သီရိလင်္ကာ သို့မဟုတ် သီဟိုဠ်လို့ခေါ်တဲ့ ကျွန်းနိုင်ငံလေးက ရဟန်းတော်များရဲ့ နေ့စဉ်ဘ၀ဟာ လူများနဲ့ အတော်လေး နီးနီးကပ်ကပ် ရှိပါတယ်။ တပူးတွဲတွဲ နေလေ့ရှိတယ်ဆိုတဲ့ အဓိပ္ပါယ်မျိုးတော့ မဟုတ်ပါဘူး။ လူတွေရဲ့ ဒုက္ခသုက္ခတွေကို ခံစားနိုင်လောက်တဲ့ လက်တစ်ကမ်းအကွာမှာ ရှိနေလေ့ရှိတဲ့ သဘောမျိုးဆိုရင် မှန်မယ်လို့ ထင်ပါတယ်။ 

မြန်မာနိုင်ငံက ရဟန်းတော်အများစုဟာ ကျေးလက်ဒေသများက ဖြစ်ပါတယ်။ အသိပညာ ဗဟုသုတ စီးပွားရေး အစစ အရာရာ ခေါင်တဲ့အရပ်ဒေသတွေကပါ။ အဘက်ဘက်ကထူးချွန် ထိပ်တန်းရောက်အောင် တက်လှမ်းနိုင်ခဲ့တာကိုကြည့်ရင် မြန်မာဗုဒ္ဓဘာသာတွေရဲ့ ကြီးမြတ်တဲ့ သဒ္ဓါတရားတွေ ထူးခြားတဲ့ ပင်ကိုယ်အလှစိတ်ထားတွေကို သတိမထားမိဘဲ မနေနိုင်လောက်အောင်ပါ။ အရာရာကို ရင်ဘောင်မတန်းနိုင်ပေမယ့် အရာရာမှာ နိမ့်ကျနေတာမျိုးတော့ မဟုတ်ပါဘူး။
ကိုယ့်အကြောင်းတွေ ရေးလို့ပြောလို့ မကုန်နိုင်သလို အများအကြောင်းတွေလည်း ကုန်ဆုံးဖွယ်ရာ မရှိပါဘူး။ ဒီတော့ ကိုယ်နဲ့ဆက်စပ်တဲ့ သူများအကြောင်းလေးတွေ အကြောင်းတိုက်ဆိုင်ရင် ပြောကြည့် နားထောင်ကြည့်တာပေါ့။ ဗဟုသုတလည်းရ အသိဥာဏ်လည်းဝဆိုရင် ဘ၀မှာ မေ့ပျောက်ချင်စရာတွေကို ခဏပဲဖြစ်ဖြစ် မေ့ပျောက်လို့ရနိုင်ရင် ကောင်းတာပဲ မလား။

ဆက်ပါဦးမည် ………………… ။

မေတ္တာဖြင့်-
အရှင်ဥတ္တမာနန္ဒ (ပေရာဒေနိယတက္ကသိုလ်)
Saturday, September 06, 2014