“အခုလို တစ်ယောက်နဲ့တစ်ယောက် တွေ့ကြဆုံကြရတာ ဒါဟာ ပဋ္ဌာန်းဆက်ကြောင့်ပဲ၊ ပဋ္ဌာန်းဆက် ရှိလို့သာ ဒီလိုနေရာမျိုးမှာ လာဆုံတွေ့ကြတာပေါ့...”စတဲ့ အပြောတွေနဲ့ ပဋ္ဌာန်းဆက် ဆိုတဲ့ စကားကို မြန်မာဗုဒ္ဓဘာသာအများ တော်တော်များများ အသုံးပြု ပြောဆိုကြတာ တွေ့ရတတ်ပါတယ်။ တစ်လောကပဲ ကျောင်းသားတွေ ကျောင်းကိုရောက်လာပြီး “ဘုန်းဘုန်းဘုရား… တပည့်တော်တို့ရဲ့ ပဋ္ဌာန်းဆက် ကတော့ တော်တော်ကို အံ့သြစရာကောင်းတယ်၊ ဒီလိုနေရာမှာ ဒီလိုလူမျိုးတွေနဲ့ လာပြီးတွေ့ဆုံဖြစ်မယ်လို့ တစ်ခါမှကို စိတ်ကူးမရှိခဲ့ဘူးဘုရား..”စသဖြင့် သူတို့တွေ ကျင်လည်ရတဲ့ ပတ်ဝန်းကျင်မှာ တွေ့ကြဆုံကြရတဲ့ သူတွေအကြောင်း ပြောဆိုဖြစ်ကြပါသေးတယ်။ သူတို့တွေလည်း ပဋ္ဌာန်းဆက် ဆိုတဲ့ စကားကို ဘယ်ရယ်မသိ ပြောဆိုကြပြန်ပါတယ်။ သူတို့စကားကို နားထောင်ပြီး ဘုန်းဘုန်းက “ကလေးတို့တွေ ပဌာန်းဆက် ဆိုတဲ့ စကားကို တော်တော်များများ ပြောဆိုသုံးစွဲတတ်ကြတယ်၊ ဒီစကားရဲ့ တိကျတဲ့ အဓိပ္ပါယ်က ဘာလဲ”လို့ ရုတ်တရက် မေးလိုက်တော့ သူတို့တွေ တစ်ယောက်ကို တစ်ယောက်ကြည့်ပြီး “ဘာကိုရည်ရွယ်တယ် ဆိုတာတော့ နားလည်သလိုရှိတယ်၊ တိတိကျကျ အဓိပ္ပါယ်တော့ မပြောတတ်ဘူးဘုရား”လို့ လျှောက်ပါတယ်။ ဒါနဲ့ ဘုန်းဘုန်းလည်း ဒီပဋ္ဌာန်းဆက် ဆိုတဲ့ စကားရဲ့ အဓိပ္ပါယ်နဲ့ ဆက်စပ်ရာ အကြောင်းတွေကို သူတို့နားလည်အောင် ပြောပြဖြစ်ပါတယ်။
ပဋ္ဌာန်းဆက်ဆိုတဲ့ စကားကို အလွယ် နားလည်အောင် ပြောရရင် အကြောင်းအကျိုး ဆက်စပ်မှုလို့ ပြောနိုင်ပါတယ်။ တကယ်တော့ ဒီပဋ္ဌာန်းဆက်ဆိုတဲ့ စကားမှာပါတဲ့ ပဋ္ဌာန်းက ပဋ္ဌာနဆိုတဲ့ ပါဠိကို မြန်မာလို ပဋ္ဌာန်းလို့ အလွယ် ပြောလိုက်ကြတာ ဖြစ်ပါတယ်။ ပ တစ်ပုဒ်၊ ဌာန တစ်ပုဒ်ခွဲပြီး ပ က အထူးထူးအပြားပြားလို့ အဓိပ္ပါယ်ရကာ ဌာန ကတော့ အကြောင်းလို့ အဓိပ္ပါယ်ရပါတယ်။ ပဋ္ဌာနလို့ တစ်ပေါင်းတည်း ဆိုရင်တော့ အထူးထူးအပြားပြား များစွာသော အကြောင်းတရားလို့ ဆိုနိုင်ပါတယ်။ ဒီသဘောအရ ဘယ်အရာမဆို အကြောင်းတရားက အရေးကြီးတယ်ဆိုတာ သိနိုင်ပါတယ်။ အကြောင်းကင်းပြီး ဖြစ်တဲ့အရာ မရှိဘဲ အကြောင်းတရားများကြောင့် အကျိုးတရားများ ဖြစ်ပေါ်လာရခြင်း ဖြစ်ပါတယ်။ ဒီလိုအကြောင်းတရား အမျိုးမျိုးကြောင့် အကျိုးတရားအနေနဲ့ တစ်ခုပြီးတစ်ခု ဆက်စပ်ဖြစ်ပေါ် လာခဲ့ကြတာကိုပဲ ပဋ္ဌာန်းဆက်ကြောင့်လို့ ဆိုခြင်းဖြစ်ပါတယ်။ ဒါကြောင့် ပဋ္ဌာန်းဆက်ဆိုတာ အကြောင်းအကျိုး ဆက်စပ်မှုပဲလို့ ဆိုခြင်းဖြစ်ပါတယ်။
ဟုတ်ပါတယ်။ လောကမှာရှိတဲ့ သူတွေကို ကြည့်လိုက်ရင် ပဋ္ဌာန်းဆက်နဲ့ ကင်းတဲ့သူ တစ်ဦးတစ်ယောက်မှ မရှိပါဘူး။ ကျင်လည်ခဲ့ရတဲ့ ဘ၀သံသရာတွေကလည်း များလေတော့ တစ်ချိန်မဟုတ်တစ်ချိန် ပဋ္ဌာန်းဆက်တွေ ရှိခဲ့ကြ၊ ပဋ္ဌာန်းဆက်တွေ ဖြစ်ခဲ့ကြမှာ ဖြစ်ပါတယ်။ ဒါကြောင့်လည်းပဲ ဘယ်လိုမှ မျှော်မှန်းမထားတဲ့ နေရာတွေမှာ ဘယ်တုန်းကမှ မစဉ်းစားဖူးတဲ့ သူတွေနဲ့တွေ့ပြီး ဒီဘ၀မှာ တော်စပ်ခဲ့တဲ့ သူတွေနဲ့ ဝေးကာ တစ်ခြားသူတွေနဲ့ တွေ့ကြဆုံကြ ကြုံကြရတာ ဖြစ်ပါတယ်။ မွေးတာကတစ်နေရာ နေရတော့ တစ်နေရာ ဖြစ်နေကြတဲ့အပြင် တစ်မိသားစုတည်း ဖြစ်နေပေမယ့် တစ်နေရာစီဖြစ်နေပြီး မတူညီတဲ့ မိသားစု အသိုင်းအ၀ိုင်းတွေနဲ့ ပဋ္ဌာန်းဆက်တွေ ဖြစ်နေခဲ့ကြတာ ဖြစ်ပါတယ်။ ဒါဟာ ဘ၀သံသရာ ကျင်လည်ခဲ့ချိန်က ဆက်စပ်ခဲ့ကြတဲ့ အကြောင်းတရား ပဋ္ဌာန်းဆက်များကြောင့်ပဲ ဖြစ်ပါတယ်။ ကျင်လည်ခဲ့ရတဲ့ ဘ၀ါဘ၀တွေက များလွန်းလှတော့ တစ်ဘ၀မဟုတ် တစ်ဘ၀မှာ တစ်နည်းနည်းနဲ့တော့ ပဋ္ဌာန်းဆက်တွေ ရှိခဲ့ကြပြီး ဒီအကြောင်း တရားတွေကပဲ ဒီဘ၀မှာ မမျှော်မှန်းထားတဲ့ အကျိုးဆက်တွေအဖြစ် ပြန်လည်တွေ့ကြုံ ခံစားခဲ့ကြရတာ ဖြစ်ပါတယ်။
မြတ်စွာဘုရားရှင်က အနမတဂ္ဂသံယုတ်မှာ “ရဟန်းတို့… ဤသံသရာ၏ အစကို မသိနိုင်၊ အ၀ိဇ္ဇာဖြင့် ပိတ်ဖုံးအပ်ကုန်သည် တဏှာနှောင်ကြိုးဖြင့် ဖွဲ့ချည်အပ်ကုန်သည်ဖြစ်၍ ဤဘ၀မှ ထိုဘ၀၊ ထိုဘ၀မှ ဤဘ၀သို့ ပြေးသွားကျင်လည်ကြရကုန်သော သတ္တ၀ါတို့၏ ရှေ့အစွန်းသည် မထင်နိုင်၊ ရဟန်းတို့… ဤရှည်စွာသော ကာလ၌ အမိမဖြစ်ဖူးသော သတ္တ၀ါကို ရလွယ်သည်မဟုတ် (အမိမဖြစ်ဖူးသော သူမရှိ) (မာတုသုတ်)၊ အဖမဖြစ်ဖူးသော သတ္တ၀ါကို ရလွယ်သည်မဟုတ် (ပိတုသုတ်)၊ ညီအစ်ကို မဖြစ်ဖူးသော သတ္တ၀ါကို ရလွယ်သည်မဟုတ် (ဘာတုသုတ်)၊ ညီမနှစ်မအစ်မ မဖြစ်ဖူးသော သတ္တ၀ါကို ရလွယ်သည်မဟုတ် (ဘဂိနိသုတ်)၊ သားမဖြစ်ဖူးသော သတ္တ၀ါကို ရလွယ်သည်မဟုတ် (ပုတ္တသု)၊ သမီးမဖြစ်ဖူးသော သတ္တ၀ါကို ရလွယ်သည်မဟုတ် (ဓီတုသုတ်)၊ ထိုသို့ဖြစ်ခြင်းသည် အဘယ့်ကြောင့်နည်း…၊ ရဟန်းတို့… ဤသံသရာ၏ အစကို မသိနိုင်၊ အ၀ိဇ္ဇာဖြင့် ပိတ်ဖုံးအပ်ကုန်သည် တဏှာနှောင်ကြိုးဖြင့် ဖွဲ့ချည်အပ်ကုန်သည်ဖြစ်၍ ဤဘ၀မှ ထိုဘ၀၊ ထိုဘ၀မှ ဤဘ၀သို့ ပြေးသွားကျင်လည် ကြရကုန်သော သတ္တ၀ါတို့၏ ရှေ့အစွန်းသည် မထင်နိုင်၊ ရဟန်းတို့ ဤသို့လျှင် ရှည်စွာသော ညာဉ့်တို့ပတ်လုံး သင်တို့သည် ဆင်းရဲကို ခံစားရဘူးလေပြီ၊ ပြင်းထန်သော ဆင်းရဲကို ခံစားရဖူးလေပြီ၊ ပျက်ဆီးခြင်းကို ခံစားရဖူးလေပြီ၊ သချိုင်းမြေပုံသည် တိုးပွားလှလေပြီ၊ ရဟန်းတို့… ဤအလုံးစုံသော သင်္ခါရ တရားတို့၌ ငြီးငွေ့ခြင်းငှါ သင့်လှတော့သည်သာတည်း၊ တပ်ခြင်းကင်းခြင်းငှါ သင့်လှတော့သည်သာတည်း၊ လွတ်မြောက်ခြင်းငှါ သင့်လှတော့သည်သာတည်း…” (သံယုတ်ပါဠိတော်၊ အနမတဂ္ဂသံယုတ်) လို့ ဟောတော်မူပါတယ်။
ဒီဒေသနာတော်အရ သတ္တ၀ါတွေရဲ့ ဘ၀သံသရာ ရှည်ကြာမှု၊ ပဋ္ဌာန်းဆက် များနေမှုကို ကောင်းကောင်းသဘော ပေါက်နိုင်ပါတယ်။ မရေမတွက်နိုင်တဲ့ ဘ၀တွေမှာ ပြေးသွားကျင်လည်ကြရတဲ့ သတ္တ၀ါတွေအနေနဲ့ မဖြစ်ဖူးတဲ့ ဘ၀ဆိုတာ မရှိနိုင်ပါဘူး။ တစ်ချိန်ချိန်မှာ အဖေဖြစ်ချင်လည်း ဖြစ်ခဲ့ကြမှာပါ။ အမေဖြစ်ချင်လည်း ဖြစ်ခဲ့ကြမှာပါ။ အစ်ကိုအစ်မ၊ ညီညီမ၊ ဇနီးမယား လင်ယောကျာ်း စသဖြင့် ဘ၀အစုံစုံမှာ တစ်မျိုးမျိုးတော့ ဖြစ်ခဲ့ကြမှာ သေချာပါတယ်။ ဒီလို အကြောင်းတရားတွေ ရှိခဲ့ကြလို့လည်း ဒီဘ၀မှာ အကျိုးတရား အနေနဲ့ လာဆုံဖြစ်ခဲ့ကြတာ ဖြစ်ပါတယ်။ လာဆုံတဲ့အခါမှာလည်း တစ်ချို့က အကောင်းတွေနဲ့ ဆုံကြပေမယ့် တစ်ချို့ မကောင်းတွေနဲ့ ဆုံကြရပြန်ပါတယ်။ ဒါကတော့ ပဋ္ဌာန်းဆက်ကောင်းတဲ့ သူက အကောင်းဆုံမှာဖြစ်ပြီး ပဋ္ဌာန်းဆက် မကောင်းတဲ့သူက မကောင်းဆုံရမယ့် သဘောပဲ ဖြစ်ပါတယ်။ ဘယ်လိုပဲ ဆုံဆုံ ဒါဟာ အကြောင်းကြောင့် အကျိုးဖြစ်တဲ့ သဘောပဲ ဖြစ်ပါတယ်။ ဒီလိုအကြောင်းအကျိုးတွေ ဖြစ်နေကြတာကိုပဲ ဒီခေတ်စကားနဲ့ ပဋ္ဌာန်းဆက်ရှိနေကြတာလို့ ဆိုကြခြင်း ဖြစ်ပါတယ်။
တစ်ဘက်က ပြန်ကြည့်ရင်လည်း ဒီလို ပဋ္ဌာန်းဆက်တွေ ရှိနေသမျှ ဘ၀မှာ သံသရာရှည်မှုတွေက ရှိနေကြဦးမှာ ဖြစ်ပါတယ်။ ဒီလို အကြောင်းတရားတွေ ရှိနေသမျှ အကျိုးတရားအနေနဲ့ ဆင်းရဲတွေလည်း ရှိနေကြရဦးမှာ ဖြစ်ပါတယ်။ ပဋ္ဌာန်းဆက်တွေကို မဖြတ်နိုင်သေးသမျှ နောက်ထပ်အဆက် အဆက်တွေက ထပ်ထပ်ဖြစ်နေကြဦးမှာ ဖြစ်ပါတယ်။ ဒီဘ၀မှာ ပဋ္ဌာန်းဆက်ကောင်းလို့ သူတော်ကောင်းတွေနဲ့ တွေ့သူတွေ ရှိကြသလို၊ ပဋ္ဌာန်းဆက် မကောင်းတဲ့အတွက် မကောင်းတဲ့ သူတွေနဲ့ တွေ့ကြဆုံကြ ကြုံကြရသူတွေလည်း ရှိနေကြပေမယ့် ဘယ်လိုလူမျိုးတွေနဲ့ပဲ ကြုံကြုံ ပဋ္ဌာန်းဆက်တွေကို မဖြတ်နိုင်သေးရင်တော့ တစ်ခါပြန်ပြီး ဆုံကြရဦးမှာ ဖြစ်ပါတယ်။ တစ်ခါဆုံတဲ့ အခါမှာတော့ အကောင်းအဆိုးတွေနဲ့ ကြုံမကြုံဆိုတာ သေချာပေါက် မပြောနိုင်ပါဘူး။ အကောင်းဆုံးကတော့ အသေချာဆုံးဖြစ်တဲ့ ဒီဘ၀မှာပဲ ပဋ္ဌာန်းဆက်တွေကို ဖြတ်နိုင်အောင် ကြိုးစားတာ အကောင်းဆုံးပါပဲ။
သေချာတွေးကြည့်လိုက်ရင် သတ္တ၀ါတွေရဲ့ ပဋ္ဌာန်းဆက်ကို ရှည်ကြာစေမှုတွေမှာ တွယ်တာမှု သံယောဇဉ်တွေက အဓိကကျစေပါတယ်။ ပုထုဇင်တွေရဲ့ သဘောကိုက ဖြစ်ရာဘ၀မှာ တွယ်တာတပ်မက်တတ်တဲ့ ဘ၀နိကန္တိက လောဘဇောက ရှိနေကြတော့ ဘယ်နေရာ ဘယ်ဒေသရောက်ရောက်၊ ဘယ်လူမျိုး ဘယ်ပုဂ္ဂိုလ်တွေနဲ့ပဲ ကြုံကြုံ အစပိုင်းမှာ အခက်အခဲ ဖြစ်တတ်ကြပေမယ့် နောက်တော့လည်း အဲဒီနေရာလေးကို သဘောကျရတာနဲ့ အဲဒီလူမျိုးတွေကို သဘောကျရတာနဲ့ မခွဲနိုင်၊ မခွါရက် ဖြစ်ကုန်ကြတာပါပဲ။ ဒါတွေဟာ ဘယ်သူမှလုပ်တဲ့ ပဋ္ဌာန်းဆက်တွေမဟုတ်ဘဲ ကိုယ်ကိုယ်တိုင် လုပ်ခဲ့တဲ့ ပဋ္ဌာန်းဆက်တွေပဲ ဖြစ်ပါတယ်။ ဒီပဋ္ဌာန်းဆက်တွေ ရှည်အောင်လုပ်နိုင်တာလည်း ကိုယ်ပဲဖြစ်သလို ပဋ္ဌာန်းဆက်တိုအောင် လုပ်နိုင်တာလည်း ကိုယ်ပဲဖြစ်ပါတယ်။ ဒါကြောင့် အကောင်းအဆိုး မလို၊ သံသရာရှည်မှာကို မလိုတဲ့ သူတွေအနေနဲ့ ကိုယ်ကိုယ်တိုင်ပဲ ဒီပဋ္ဌာန်းဆက်တွေကို ဖြတ်နိုင်အောင် ကြိုးစားကြရမှာပါလို့ ဆိုခြင်း ဖြစ်ပါတယ်။
ပဋ္ဌာန်းဆက်တွေကို ဖြတ်ဖို့ဆိုတာကတော့ ဉာဏ်နဲ့ဖြတ်မှပဲ ပြတ်မှာဖြစ်ပါတယ်။ ၀ိပဿနာဉာဏ်နဲ့ အကြောင်းပဋ္ဌာန်းတွေကို ဖြတ်နိုင်မှ အကျိုးတွေလည်း ပြတ်မှာဖြစ်ပါတယ်။ အကြောင်းပြတ်သွားပြီဆိုရင် အကျိုးလည်း မထပ်တော့ဘဲ နောက်ထပ်ပြန်ပြီး ဘ၀သစ်ဖြစ်စရာပါ မရှိနိုင်တော့ပါဘူး။ နောက်ထပ်ဘ၀သစ် မဖြစ်ဘူးဆိုရင် ဒါဟာ နိဗ္ဗာန်ဝင်သွားတာပဲ ဖြစ်ပါတယ်။ ဒါကြောင့် ပဋ္ဌာန်းဆက်တွေကို ဖြတ်ပြီး နိဗ္ဗာန်ဝင်နိုင်ဖို့ အတွက် အရိယာမဂ်ဉာဏ်တွေ ရစေနိုင်တဲ့ ၀ိပဿနာအလုပ်ကို ကြိုးစားအားထုတ်ကြဖို့ သူတော်ကောင်းများက တိုက်တွန်းကြခြင်း ဖြစ်ပါတယ်။
ဘယ်လိုပဲ ဖြစ်ဖြစ် လောကမှာ ပဋ္ဌာန်းဆက်ကြောင့် သံသရာကျင်လည်ရင်း ခဏတဖြုတ် လာတွေ့ကြရတဲ့ အခိုက်မှာ အတိတ်အတိတ်က တော်စပ်ခဲ့ဖူးတဲ့ ဆွေမျိုးတွေနဲ့ ပြန်တွေ့တာပဲလို့ သဘောထားပြီး ပဋ္ဌာန်းဆက်ကောင်းတွေနဲ့ ကြုံကြရသူတွေ အနေနဲ့လည်း အခုကောင်းနေပေမယ့် နောင်ကြုံရမယ့် ပဋ္ဌာန်းဆက်ဟာ ဘယ်လိုရှိမယ်ဆိုတာ မသိနိုင်သလို ပဋ္ဌာန်းဆက်ဆိုးတွေနဲ့ ကြုံကြရသူတွေ အနေနဲ့လည်း ဒီထက်ဆိုးတဲ့ ပဋ္ဌာန်းဆက်တွေနဲ့ မကြုံဖူးဆိုတာ မသိနိုင်တဲ့အတွက် လက်ရှိအခြေအနေမှာပဲ အကောင်းအဆိုး အကြောင်းပဋ္ဌာန်းဆက်တွေကို မဆက်ဘဲ နေနိုင်အောင် ကြိုးစားတာ အကောင်းဆုံးပဲ ဖြစ်ပါတယ်။
ဒါကြောင့် ပဋ္ဌာန်းဆက် ပဋ္ဌာန်းဆက်လို့ ပြောနေကြသူတွေ အနေနဲ့ ပဋ္ဌာန်းဆက်ဆိုတာ တစ်ခြားမဟုတ်၊ အကြောင်းအကျိုး ဆက်စပ်မှုကို ဆိုတာဖြစ်ကြောင်း သေချာသဘောပေါက် နားလည်ပြီး အကြောင်းရှိနေသမျှ အကျိုးရှိနေမှာ ဖြစ်တဲ့အတွက် အကောင်းအဆိုး အကြောင်းအကျိုး တရားများဟာ ကောင်းကောင်းဆိုးဆိုး သံသရာရှည်ကြာမှုကိုသာ ဖြစ်စေနိုင်ကြောင်း နှလုံးသွင်းဆင်ခြင်ကာ အကြောင်းဖြစ်တဲ့ ပဋ္ဌာန်းဆက်တွေကို ဉာဏ်နဲ့ဖြတ်နိုင်အောင် သတိတရားလက်ကိုင်ထားလို့ အမြန်ဆုံး ကြိုးစားသင့်ပါကြောင်း စေတနာစကား မေတ္တာအားဖြင့် အသိတရား ပါးလိုက်ရပါတယ်။ အားလုံး ပဋ္ဌာန်းဆက်တွေကို ဖြတ်နိုင်ကြပါစေ…။
အရှင်ဝိစိတ္တ (မနာပဒါယီ)
[Reference: www.forverfriends.ning.com]
No comments:
Post a Comment