ပီလောပီနံကိတ်မုန့်ကို မိတ်ဆွေတစ်ယောက်အိမ်မှာစားဖူးတာပါ။
တစ်ခါမေးဖူးပေမယ့် လုပ်ကြည့်မဖြစ်ဘူး။
နောက်တစ်ခေါက်ထပ်မေးတဲ့အခါ
လန်ဒန်အလည်ရောက်နေတဲ့အဖေက
“မအေတူသမီး မဟုတ်လိုက်တာ။ သမီးအမေဆို
အစားအသောက် ကိုမြည်းကြည့်တာနဲ့ ဘာတွေပါလဲ၊
ဘယ်လိုလုပ်ရင်ဖြစ်မလဲ သိတယ်”တဲ့။
အမေ့ကိုဘယ်လိုမှ ယှဉ်လို့မရမှန်းသိပေမယ့်
အဖေမက မခံချင်အောင်ပြောလိုက်တဲ့ဒဏ်ကို
တော်တော်မခံနိုင်ဖြစ်သွားတယ်။
အဲဒါနဲ့ ပီလောပီနံထုပ်သွားထပ်ဝယ်တော့
ဆိုင်က ဖိလစ်ပိုင်လူမျိုးOso (အိသက်သားတွေ၊ သမီးတွေက
သူတို့ Cartoonဇာတ်ကောင်Oso နဲ့တူလို့
သူ့ကို Oso လို့ နာမည်ပေးထားတယ်) က
ဘာလို့ဒီဟာကို တစ်နေ့တည်း
ခဏခဏလာဝယ်တာတုန်းမေးတော့မှ
မုန့်လုပ်တာမဖြစ်လို့ဆိုတော့ သူကဒီနည်းလေးပေးပါတယ်။
ဒီမုန့်က ဖိလစ်ပိုင်က မုန့်လုပ်နည်းလေးပါ။
လုပ်ရတာလွယ်ပြီး စားလို့လည်းကောင်းပါတယ်။
ကြိုက်လို့ ခဏခဏစားဖြစ်တာလေးပါ။
• ပါဝင်ပစ္စည်းများ
( မုန့်ဖုတ်ဗန်းအကျယ် ၆'' ၊ ၄'' ၊ အနက် ၃'' ခွဲ)
• ပီလောပီနံGrated Cassava - ၄၅၀ ဂရမ်( ၂ထုပ်) (အလွှာလိုက်ဖြစ်အောင်ခြစ်ပါ) ၊
• နို့ဆီ (၁ဘူး)
• ကြက်ဥ(၂လုံး)
• အုန်းနို့ (၁ဘူးခွဲ)
• ဆား (လက်ဖက်ရည်ဇွန်း တစ်ဝက်)
• နွားနို့ (ဆန်ချင်ခွက် ၁ခွက်)
• ပြုလုပ်နည်း
(၁) ပီလောပီနံ ခြစ်ပြီးသားများနဲ့
နို့ဆီကိုဘူးရဲ့ ၃ ပုံ ၂ ပုံ ထည့်ပါ။
ပြီးလျှင် ကြက်ဥ (၂လုံး) ၊ နွားနို့၊ ဆား ၊
အုန်းနို့ (တစ်ဘူးနဲ့တစ်ဝက်)တို့ကိုထည့်ပါ။
(အုန်းနို့နဲ့နို့ဆီချန်ခိုင်းတာနောက်ပြန်သုံးမှာမို့ပါ)
(၂) အထက်ပါအရသာအရောအနှောများကို
သမအောင်ရောမွှေပြီး ထောပတ်သုတ်ထားသော
မုန့်ဖုတ်မယ့်ပန်းကန်ထဲ ထည့်ပြီး
၁၈၀ ဒီဂရီ နဲ့ ၃၅ မိနစ် အပေါ်မီး ၊ အောက်မီးနဲ့ဖုတ်ပါ။
(၃) ပြီးလျှင် Oven ထဲကပြန်ထုတ်ကာ
ခုနကကျန်သော အုန်းနို့နဲ့ နို့ဆီကို ရောကာ
မုန့်သားပေါ်ဖြန့်ခင်းပေးပါ။ Oven ထဲ ပြန်ထည့်ပြီး
အပေါ်မီး ၁၅၀ ဒီဂရီနဲ့ ၁၀ မိနစ်ခန့် ထားပေးရင်ရပါပြီ။
အအေးခံပြီးနောက် အနံ့မွှေးပြီး ဆိမ့်နေသော
ပီလောပီနံမုန့်လေး လှီးစိတ်စားလို့ရပါပြီ။
Shared from Food Magazine (FB)
No comments:
Post a Comment