ကျွန်မရဲ့ အတွေ့အကြုံအရတော့ နားထောင်သူကောင်းမဟုတ်တော့တဲ့အခါ၊ နှုတ်လုံတဲ့ မိတ်ဘက်ကောင်းမဖြစ်တဲ့အခါ၊ နိုင့်ထက်စီးနင်လုပ်တာ.. စတာတွေကြောင့် အဖိုးတန်မိတ်ဆွေတွေကို ဆုံးရှုံးရတယ်လို့ ယူဆပါတယ်။
ကျွန်မတို့မှာ အခက်အခဲတွေ၊ ပြသနာတွေ၊ စိတ်ကျဉ်းကျပ်မှုတွေ ကြုံလာတဲ့အခါ အမြဲရင်ဖွင့်တိုင်ပင်လို့ ရတဲ့ သူတွေကို သတိရတတ်ပါတယ်။ အဲ့ဒီလို သတိရပြီး သူတို့နဲ့ တွေ့ဆုံတဲ့အခါ ပြသနာတွေကို အိတ်သွန်ဖာမှောက် တိုင်ပင်ဆွေးနွေးပါတယ်။ ကျွန်မတို့ရဲ့ အဖိုးတန်မိတ်ဆွေတွေကတော့ တကယ့်နားထောင်သူကောင်းတွေပေါ့။
စကားတွေ မဆုံးခင်အထိ ဘာကိုမှ မဝေဖန်ဘဲ နားထောင်ပြီး အေးအေးဆေးဆေး ပြန်လည်ဖေးမပေးတတ်ကြတာကိုတော့ ကြုံဖူးကြမယ်ထင်ပါတယ်။ ဒါပေမယ့် ကျွန်မတို့ဟာ တစ်ခါတရံ နားထောင်သူကောင်းဖြစ်ဖို့ မေ့လျော့နေကြပါတယ်။ ဒီလိုမေ့လျော့မှုတွေကြောင့် ကျွန်မတို့ရဲ့ အဖိုးတန်မိတ်ဆွေတွေဟာ တိုင်ပင်စရာမရှိတော့ဘဲ နောက်ထပ် အဖိုးတန်မိတ်ဆွေတွေ ရရှိပြီး ဘ၀ခရီးကို အပြည့်အ၀ဖြတ်သန်းကြပါတယ်။
နောက်တစ်ခုက နှုတ်လုံမှုပါပဲ။ ဒါဟာ လူ့ကျင့်ဝတ်တစ်ခုလိုပဲ အင်မတန်မှ အရေးကြီးလှပါတယ်။ ဒီကိစ္စနဲ့ ပတ်သက်ရင်တော့ ကျွန်မနဲ့ ကျွန်မရဲ့ အဖိုးတန်မိတ်ဆွေတွေကြားမှာ အခိုင်အမာတည်ဆောက်ထားတဲ့ ခံတပ်ကြီးတစ်ခုလို တစ်ဦးချင်းစီရဲ့ ပြသနာတွေ၊ ရင်ဖွင့်သံတွေ၊ ဖြေရှင်းနေရတဲ့ အခက်အခဲတွေဟာ ကျွန်မတို့ရဲ့ ကြားမှာသာ ရှိနေပြီး ဘယ်တော့မှ ဘယ်သူ့ကိုမှ ထုတ်မပြောတဲ့ စကားတွေအဖြစ် သိမ်းဆည်းထားပါတယ်။ အရေးကြီးကိစ္စနဲ့ ဖွင့်ပြောရမယ်ဆိုရင်လည်း ကျွန်မတို့ရဲ့ သဘောတူညီချက်ကို အင်မတန်မှ အလေးထားပါတယ်။
တစ်ခါကတော့ နှုတ်မလုံတဲ့ သူငယ်ချင်းတစ်ယောက်ကြောင့် စိတ်ပျက်စရာတွေ ကြုံခဲ့ဖူးပါတယ်။ နှုတ်မလုံမှန်းသိပြီးတဲ့နောက်မှာတော့ သူ့အတွက် ကျွန်မက ဘယ်တော့မှ အဖိုးတန်မိတ်ဆွေမဖြစ်တော့ဘဲ နားထောင်သူအဖြစ်သာ ကျန်ရှိနေပြီး တဖြည်းဖြည်းဝေးကွာခဲ့ကြပါတယ်။ နှုတ်လုံဖို့ဆိုတာ မိတ်ဆွေတွေအတွက် အလွန်အရေးကြီးတဲ့အကြောင်းလည်း လက်ဆင့်ကမ်းချင်ပါတယ်။
နောက်ဆုံးတစ်ခုကတော့ နိုင့်ထက်စီးနင်းလုပ်တာမျိုးပေ့ါ။ အဖိုးတန်မိတ်ဆွေနဲ့ မျှတတဲ့ ရင်းနှီးမှု တည်ဆောက်ရမယ့်အစား အမြဲအနိုင်ယူချင်တာ၊ ကိုယ့်စကားကိုသာ လက်ခံစေချင်တာ၊ ကိုယ့်မိတ်ဆွေရဲ့ အကြံဥာဏ်ကို အမြဲလှောင်ရယ်တာ၊ သူ့အတွေ့အကြုံတွေကို အမြဲဟာသလုပ်ပြီး အနိုင်ယူတာ။ ကိုယ့်မိတ်ဆွေ ဖွင့်ဟထားတဲ့ အားနည်းချက်တွေကို ထုတ်ဖော်ပြီး လှောင်ပြောင်အနိုင်ယူတာ စတာတွေကြောင့်လည်း မိတ်ဆွေစစ်တွေကို ဆုံးရှုံးတတ်ပါတယ်။
ဒါကြောင့် နှုတ်လုံပြီး အနိုင်မယူတတ်ဘဲ နားထောင်တတ်သူတွေအဖြစ် မိတ်ဆွေတွေကြားမှာ ရင်နှီးမှု တည်ဆောက်ကြဖို့ကတော့ အမြဲအရေးကြီးပါတယ်။ ဘာ့ကြောင့်လဲဆိုတော့ လူဆိုတာ တစ်ဦးတည်းနေထိုင်တဲ့ သတ္တ၀ါမှ မဟုတ်တာလေ။
လေးစားလျှက်
ခင်နှင်းကြည်သာ
(၅-၃-၂၀၁၆)
Photo Credit to: Original Uploader
No comments:
Post a Comment