" ငိုပြီဗျို့ .............. "

ဝမ်းနည်းတယ်…..

အရမ်းကို ဝမ်းနည်းတယ်....

ဘာနဲ့ နှိုင်းရမှန်းမသိ.. စကားလုံးကြွယ်အောင် စာပေလေ့လာမှုနည်းတဲ့ ကိုယ့်အတွက် စကားလုံးတွေ ဆင်းရဲ လိုက်တာ....

ငယ်ထိပ်ကို မြွေပေါက်တာ.. ဟုတ်တယ် အဲဒါ ဟုတ်တယ်။ ရုံးဆင်းခါနီး ငိုချင်နေတာကြောင့် သန့်စင်ခန်းထဲ လက်ဆေးရင်း ငိုနေလိုက်တယ်။ ရေတွေဖွင့်ထားမိတာ ဘယ်လောက် ကြာသွားပါလိမ့်.....။ အိမ်မြန်မြန်ပြန်မယ်။ အိမ်ကျမှ အားရပါးရ ငိုတော့မယ်......

တစ်လမ်းလုံးလည်း စဉ်းစားနေမိတယ်။ သူဘာလို့ ငါ့ကို အဲဒီလောက် ပြင်းထန်တဲ့ စကားတွေ ပြောရတာလည်း။ ပြောရက်လိုက်တာ။ အိမ်ရောက်တော့ ကွန်ပျူတာ အရင်ဖွင့်တယ်။ သူပို့ထားတဲ့စာကို အထပ်ထပ် ဖတ်ရင်း ရင်ထဲမှာဆို့တက်၊ မျက်ရည် အသွင်ပြောင်း အရှိန်လည်း ကောင်းသလို လမ်းကြောင်း အမျိုးမျိုးနဲ့ စီးကျလာတယ်။

ဟီးး ဟီးး ရွှတ်.. ဟီးးးး ဟီးးးး

" သမီးလေ ရုံးကပြန်ရောက်ပြီပေါ့။ အလုပ်ရှုပ်နေလား " G Mail ရဲ့ Chat Box ကနေ ဖေကြီး နှုတ်ဆက်နေတာပါ။

" ဖေကြီး မီးငိုနေတာ "

" ဟောဗျာ.. ဘာဖြစ်လို့ "

အမှန်ကတော့ ရင်ဖွင့်ချင်ပေမယ့် ရှင်းမပြချင်၊ လုံးလုံးရှင်းပြလို့ မဖြစ်ပါ.......

သူဖြေရှင်း ပေးချင်နေမှာ သိပေမယ့် စိတ်မပူစေချင်။ စိတ်မရှုပ်စေချင်။ ပြီးတော့ ဆက်ငိုချင်သေးတယ်။

" ဖေကြီး လူ့သဘာဝ ပြည့်စုံအောင် ငိုနေတာပါ မီးအိပ်တော့မယ် "

စကားဖြတ်လိုက်တာ ကောင်းပါတယ်။ ပြီးမှ ငါ့ဘာသာ ဆက်ငိုတော့ သူသိတာလိုက်လို့။ ဖေကြီးရယ် မီးတောင်းပန်ပါ တယ်။ ဆက်ငိုပါရစေ။

သူဘာလို့ အဲလောက်တောင် အထင်လွဲရတာလည်း ။

သြော်... ငါသူ့ကိုပြောတဲ့ စကားကို သူအထင်လွဲ သွားတာကိုး ။ သေစမ်းဟာ... ဘယ်လိုရှင်းပြရပါ့။ ငါ့ကို စကား တောင် မပြောချင်တော့ဘူးထင်တယ်။ ဒါမဟုတ်ဘူးဆိုတာ သူသိအောင် ဘယ်သူ့ကို အကူအညီ တောင်းရပါ့....

ဟီးး ဟီးး ရွှတ်.. ဟီးးးး ဟီးးးး

အရှိန်ပြင်းတဲ့ မျက်ရည်တွေ တစ်ပေါက်ပြီးတစ်ပေါက် .........

ဒစ်ဒစ်ဒစ်ဒစ်ဒစ်..... ( Vibrate )

" ဟလို "

" ညီမ ။ ငါပါ။ ကိုသောင်းတန်။ နင့်ကို ပြောစရာရှိလို့ ။ ကလေးဝ ဆရာတော် ကြွလာတာလေ။ နင်တို့ သွားမဖူးဘူးလား။ ခု ဆရာလေး နှစ်ပါးလည်း ကြွလာတယ်။ ဆရာလေးတို့က ကမ္ဘာအေးမှာ စာသင်တာတဲ့။ အဲဒါ ...

နောက်ပြီးတော့ ပခုက္ကူရေဘေး။ လှုမယ့်သူက လှုမယ်ပြောပြီးသား အဲဒါ ငါဖုန်းနံပါတ် ပို့လိုက်မယ် နင်ဆက်လိုက်။ ဒါနဲ့ ပခုက္ကူက မ... ရော ဘယ်လိုနေလည်း.......

နောက်တစ်ခု က ..ဘာတဲ့ သြော် World Toilet Organisation အဖွဲ့လေ ။ နင်စာစောင်ရလား။ အဲဒါ စည်းဝေးလိုက်သေးတယ်။ နင်စိတ်ဝင်စားရင် နောက်တစ်ခါ လာပေါ့ဟာ။ ငါစီစဉ်ပေးမယ်။ ....

ပြီးတော့ ...

ဒါနဲ့.... "

" အင်း ၊ အဲ ၊ ဟုတ် ၊ သြော်... " ( ဆီလျော်သလို ထည့်ဖြေခဲ့တယ်)

ဟွန်း... အဲဒါ တိတွေ ဒွိတွေ (တိပိဋက၊ ဒွိပိဋကအောင်မြင်ပြီး) မှဘုန်းကြီးထင်၊ နာမည်ကြီးဘုန်းကြီးဆို နာယကတင်ချင်တဲ့ နာယက စုဆောင်းရေးက သွားဖူးလိမ့်မယ်။ မီးတို့က ပြာတာပဲ။ မီးတို့ မနိုင်တော့ဘူး။ ဝန်ဖြစ်လာရင် ကုသိုလ်လည်းမရ။ ကိုယ့်မှာက တခြားအလုပ်တွေလည်းရှိသေး။ လူကို ပြည်ထဲရေးဝန်ကြီးများ အောက်မေ့နေလား မသိ . . . ( စိတ်ထဲကပါ ) ။

" အေး ငါပြောတာတွေ မမေ့နဲ့နော် ။ ဒါပဲဟာ ။ နောက်တွေ့ကြတာပေါ့ "

တော်ပါသေးရဲ့ ။ ဒါတောင် မိနစ် ၂၀ လောက် ကြာသွား လိုက်သေးတယ်။ သူပြောသမျှ အာရုံစိုက် လိုက်တာနဲ့ ငါငိုနေတာ ဘယ်ရောက်သွားပါလိမ့် ။ မျက်ရည်တွေလည်း ခြောက်ကုန်ပြီး။

ကွန်ပျူတာပေါ်က မရွှေ့ရသေးတဲ့ သူ့စာမျက်နှာကို မမှိတ်မသုန် ပြန်ဖတ်လိုက်တယ်။ ဟယ်.. ငါ့ကိုများ ပြောထားတာ ရစရာမရှိဘူး။ တကယ်ဆို ငါ့မှာ အဲလိုစိတ်ဓာတ်မှ မရှိတာ သူသိသင့်တာပေါ့။ ဒါမျိုး ထင်စရာလား။ အထင်များ မှားနေလားလို့ နည်းနည်းလေးမှ သူမတွေးဘူး။

ဟီးး ဟီးး ရွှတ်.. ဟီးးးး ဟီးးးး

ပါမစ်မရလို့ အပိတ်ခံထားရတဲ့ မျက်ရည်တွေကလည်း လိမ့်ဆင်းလာတော့တာပဲ.............

ဒစ်ဒစ်ဒစ်ဒစ်ဒစ်.....( Vibrate)

" ဟလို "

" ညီမက မ.......လားဟင်။ မေးချင်လို့ ဟို Sunday Dhamma School ကိစ္စ။ ဘယ်လို လှူရလည်း။ "

အဲ.. သူက အလှူရှင်။ အလှူရှင်က သဒ္ဓါပေါက်လို့ ခေါ်တာ။ သူ့သဒ္ဓါတွေအတွက် ငါကြိုးစားရှင်းပြမှ တော်ကာကျမှာ ပေါ့။

" ဒါက ဒီလိုရှိတယ် အစ်ကိုရ။ သီရိလင်္ကာ......... ၊ ခု မြန်မာနိုင်ငံ.......... ၊ ပရိယတ္တိ............ ၊ ကိုရင်.......... "

" အေး ညီမရယ်။ အစ်ကို လစဉ်လှူမယ်နော်။ အစ်ကို မေ့နေရင်လည်း သတိပေးပါဦး။ "

" ပေးရမှာပေါ့ အစ်ကိုရယ်။ သာဓု သာဓု သာဓု ပါရှင် ။ "

တကယ်ပျော်မိတာပါ။

ဒါပေမယ့် ကွန်ပျူတာကို ကြည့်မိလျက်သား။ သူ့စာကို ဖတ်မိလျက်သား။

ဟီးး ဟီးး ရွှတ်.. ဟီးးးး ဟီးးးး

ကြူကြူပါတဲ့ နောက်တစ်ခါ.......

ဒစ်ဒစ်ဒစ်ဒစ်ဒစ်..... ( Vibrate)

" ဟလို "

" အစ်မက မ.... လားဟင် ။ ကိုဇာနည် က ပိဋကတ်သုံးပုံအကြောင်း ပြောချင်လို့ အွန်လိုင်း ခုချက်ချင်း တက်ပေးပါတဲ့ ။ ဒါပဲနော်"

အင်း.. ဒါက အရေးကြီးတယ် ။ မြန်မာနိုင်ငံကနေ အိန္ဒိယမှာရှိတဲ့ တိဘက်တက္ကသိုလ်ကို ပိဋကတ်တွေ လှူဖို့ကိစ္စပါ။ အလှူ့ရှင်တွေကလည်း ချက်ချင်းကို S$ 1000 လှူသွားတာ။ ကောင်းလိုက်တဲ့သဒ္ဓါ။ မြန်မာနိုင်ငံက ကူညီတဲ့ သူကလည်း ပြောသမျှ ကုသိုလ်ချည့်မှတ်ယူပြီး မငြီးမငြူလုပ်ပေးတယ်။ ပြီးတော့ ခမျာမှာလည်း အင်တာနက်ဆိုင် တကူးတကသွားပြီး ငါ့ကို စောင့်နေမှာ ။

G Talk လေးဖွင့် သူ့ Chat Box လေးထဲ

" အစ်ကို "

" အစ်မ ။ နမောဗုဒ္ဓဿ "

သူ့စတိုင်ပါ ။ ဘယ်သူ့ကို မဆို စတွေ့လိုက်တာနဲ့ နမောဗုဒ္ဓဿ ဆိုပြီး နှုတ်ဆက်တတ်တယ်။

ပြီးတော့ ပေါ်မလာတော့။ ဟိုစာသားလေးတောင် သတိရသွားတယ်။

" စာဥ .. နင့်ကွန်နက်ရှင်ကို မစောင့်နိုင်လို့ ငါဘုန်းကြီးဝတ်သွားပြီ ။ ပုံ သာအေး "

ဆက်ငိုရင် ကောင်းမလား။ တော်သေးပါဘူးလေ။ သူပြောလို့ ငါစိတ်မဝင်စားနိုင်ရင် ဘယ်ကောင်းမလည်း။

စာအုပ်တွေ ကီလို ၁၀၀ ကျော်ပို့ဖို့ သူတော်တော် စုံစမ်းနေရမှာဘဲ ။ ငါစောင့်နေမှ ဖြစ်မယ်။ ...

နောက် တစ်နာရီလောက် ကြာတော့မှ မေးလ်ဝင်လာပါတယ်။ သူမေးချင်တာတွေ အစုံ မေးထားတယ်။

ဒါနဲ့များ စောစောစီးစီးက ငါ့ကို မေးပို့လိုက်ရင် ပြီးတာပဲ။ ဟင်း ... ခုတော့..

ငါငိုတာ ဘယ်နား ရောက်သွားပါလိမ့်..

သြော်.. ဟိုနား...

ဟ ဟာ ဟားးးးး ငိုရတယ်ဟေ့ ဗြဲ...

တကယ်ကို ခွက်ထိုးခွက်လန် ငိုရတဲ့ နေ့လေး တစ်နေ့ပါပဲ။

သြော်.. ကိုယ့်မှာ ဝမ်းနည်းစရာတွေ ရင်ကွဲပက်လက် ကြုံတွေ့ နေရတာတောင် ကိုယ်ပြုထားတဲ့ ကုသိုလ်ရေးတွေက ကိုယ့်ကို တမင် အာရုံပြောင်းပေး နေသလား (ကယ်တင် ပေးနေသလား) ထင်မှတ်ရတယ်။

နောက်တစ်ခါ အကုသိုလ်ဝိပါက် သိပ်တက်ချင်လို့ ငိုချင်သပဆိုရင် ဖေ့စ်ဘွတ်ကြီးမှာ အရင် ကြေငြာထားမယ် ။ ဘယ်သူမှ ဖုန်းမဆက်အောင်။

" ငိုပြီဗျို့ .............. "

Shared from သူနုနယ်၏ လဲနေသူထူပေးပါ