“ဆရာတော် အပြင်မှာ ဧည့်သည်ရောက်လို့ဘုရား”
ဒီနေ့ နေ့ခင်း (၂)နာရီလောက်က အခန်းထဲမှာစာကြည့်နေတုန်း ကျောင်းသားလေးလာပင့်လို့ ဧည့်ခန်းထဲ ကို လိုက်လာပါတယ်။ ဧည့်ခန်းထဲရောက်တော့ အသက်(၇၀)ကျော်အရွယ် ဒကာမကြီး တစ်ဦးနဲ့ အဖော်ဒကာတစ်ဦးကိုတွေ့ရပါတယ်။
အသက်(၇၀)ကျော်ဆိုပေမယ့်ရိုးရိုးယဉ်ယဉ်ဝတ်စားထားတာတော့မဟုတ်ပါဘူး။ ဒူခေါင်းနားအထိ တိုတဲ့ဂါဝန်စကပ် အင်္ကျီကလည်း ကြောင်ကြောင်ကြားကြားနဲ့ “ ဘင်လာဒင် ပုတီးကိုင်သလို” အကြည့်ရ အတော်ဆိုးလှပါတယ်။ စာရေးသူကိုတွေ့တော့ ပုဆိန်ပေါက်ဦးချပြီး-
“ဘုန်းဘုန်းလေးကိုအကူညီအညီတောင်းချင်လိုပါ”
“ပြောပါ ဒကာမကြီး ကူညီနိုင်တဲ့ဟာဆို အားလုံးကူညီပါမယ်”
“ပြောကိုမပြောချင်ပါဘူး၊ အိမ်က မြက်နုကြိုက်ကြီးပေါ့ဘုရား”
“မြက်က်နုကြိုက်ဆိုတာ ဘာကိုပြောတာလဲ ဒကာမကြီးရဲ့”
“ ရော် ဘုန်းဘုန်းရယ် ရိုးပါ့၊ နွားအို မြက်နုကြိုက်ဆိုတဲ့ စကားရှိတယ်လေ၊ တပည့်တော်အိမ်က ဟာကြီးကအသက်(၇၁)ရှိပြီးဘုန်းဘုန်းရေ ခုသူက သူ့ထက် အသက်တအားငယ်တဲ့ ကောင်မလေးတစ်ယောက်နဲ့ ဘာညာသာရကာ နေကြာကွာစေ့ မရိုးမသား ခိုးစားပြီး စနိုက်ကြော်နေလို့ဘုန်းဘုန်းရေ..”
ဗျာ……
(၇၀)ကျော် မော်ဒယ်အဖွားကြီးရဲ့ စကားကြောင့် စာရေးသူလည်း “ဗျာ” လို့ တခွန်းပဲ အသံထွက်နိုင်ပါတယ်။
“မဗျာနဲ့ ဘုန်းဘုန်းရေ ဒီမှာ ကြည့်ပါဦး”
လို့ပြောပြီး သူ့ဒကာကြီးနဲ့ စနိုက်ကြော်တို့ ပုံတွေကို ထုတ်ပြပါတော့တယ်။
“ရတယ်…..ရတယ် ဒကာမကြီး မပြနဲ့တော့….ရတယ်”
လို့တားလိုက်ပြီး၊ ကိလေသာမီး တောက်လောင်နေတဲ့ ဒကာမကြီးကို တရားနည်း ဘုရားနည်းနဲ့ မီးငြှိမ်းဖို့ တရားစခန်းဝင်ဖို့ အကြံပေးလိုက်ပါတယ်။
“ အမလေး တရားစခန်းကို လင်မယားနှစ်ယောက်လုံးဝင်ပါသကော ဘုရား…။ (၇)ရက်တရားစခန်းမှာ (၂)ရက်နဲ့ ပြန်လာတာ”
“ ဘယ်လိုဖြစ်ပြီး (၂) ရက်နဲ့ ပြန်လာရတာလည်း ဒကာမကြီးရဲ့”
“ဘယ်လိုဖြစ်ပါ့ဘုရား စနိုက်ကြော်တွေကြောင့်ပေါ့ဘုရား၊ ရိပ်သာမှာထမင်းကျွေတော့ ရိပ်သာက ထမင်းကျွေးတဲ့နေရာမှာ တာဝန်ယူတဲ့ ကောင်မတွေက တပည့်တော် အိမ်ကဟာကို ဟင်ထည့်ပေးတာ အမြင်ကတ်လို့ (၂) ရက်နဲ့ ပြန်ခဲ့တာ ”
မော်ဒယ်အဖွားကြီး စကာကိုကြားတော့မှ ဒီဒကာမကြီးရဲ့ အနေအထားကိုသဘောပေါက်သွားပါတယ်။ "တရားဖက်ရမယ့်အရွယ်မှာ တဏှာမက်” နေတော့ စိတ်ထဲမှာလည်း အတော်လေး အချဉ်ပေါက်သွားပါတယ်။
ဒါ့ကြောင့် စချင်စိတ်လည်းပေါက်လှတာမို့ ခပ်တည်တည်နဲ့ စာရေးသူရဲ့ ဟမ်းဖုန်းကိုထုတ်ပြီး--
“ ကဲ ဒကာမကြီးက မယားကြီးငုတ်တုတ်ရှိပါရက်နဲ့ စမောဆွဲတဲ့ ဒကာကြီးကို တလင်တမယား ဥပဒေနဲ့ တရားစွဲချင်တာမို့လား၊ ခုရန်ကုန်တိုင်းရဲမှူးဆီကို ဖုန်းဆက်ပြီး ဒကာကြီးကို ဖမ်းခိုင်းလိုက်တော့မယ်”
ဟု ခပ်တည်တည်နဲ့ စလိုက်ပါတယ်။ ဒီတော့ မော်ဒယ်အဖွားကြီးက ထိပ်ထိပ်ပြာပြာနဲ့
“ မ.. မဟုတ်ပါဘူးဘုန်းဘုန်းလေးရယ်။ တပည့်တော်က ဘုန်းဘုန်းလေး တရားကို Sky Net ကနေ နာပြီးကတည်းက ကြည်ညိုပြီး ဖူးချင်နေတာပါဘုရား။ ခုက ဒကာကြီးကိုလာတိုင်တာမဟုတ်ပါဘူးဘုရား ဘုန်းဘုန်းလေးကို လာဖူးတာပါဘုရား…”
လို့ပြောပြီး ပိုက်ဆံ(၁၅၀၀)ကို ဇွတ်လှူနေတာကြောင့် “ဦးဇင်းငွေလက်မခံဘူး” လို့ညင်းလိုက်ရပါတယ်။
အဖွားကြီးရဲ့ ဖြစ်စဉ်ကိုကြည့်ပြီး စနောက်ချင်စိတ်က ပေါက်လာပြန်တာမို့။
“ဒကာမကြီးကို ဦးဇင်းအကြံတစ်ခုပေးမယ်နော်”
“ပေးပါဘုရား၊ ဘုန်းဘုန်းလေးတို့လို့ ပညာရှိကပေးတဲ့ အကြံကို တပည့်လေးလိုက်နာပါမယ်ဘုရား”
“ခု ဒကာကြီးကိုက စမောဆွဲတာကို ဒကာမကြီးက အူတိုနေတာမို့လား၊ ဒီတော့ ဒကာကြီးကို ပြန်ပြီးအူတိုအောင် ဒကာမကြီးလည်း ပြန်ပြီးစမောဆွဲ လိုက်ပေါ့”
စာရေးသူ စကားကြားတော့ မော်ဒယ်အဖွားလည်း မျက်လုံးတွေလင်းလက်လာပြီး။
“ဟုတ်တယ် ဘုန်းဘုန်းလေးရာ… တပည့်တော် အဲလိုလုပ်ဖို့မေ့နေတာ၊ အဲလိုလုပ်မယ် စမောဆွဲမယ် စပါယ်ယာ ကောဒရိုက်ဘာပါဆွဲတော့မယ်” ဘုရားလို့အားတက်သရောပြောပြီး .
“ဒါပေမယ့် တခုတော့ရှိတယ်ဘုန်းဘုန်းရဲ့ ဘုန်းဘုန်းတပည့်တော်ကို ဆက်ကူညီပေးဦး”
“ဘယ်တခုရှိပြန်တာလဲ ဒကာမကြီးရဲ့”
“ဒီလိုလေ ဘုန်းဘုန်းလေးရဲ့ ခုခေတ်ကောင်လေးတွေက လွယ်တာမဟုတ်ဘူး၊ တပည့်တော်က အိမ်က မြက်နုကြိုက်ကြီးကို မခံချင်လို အူတိုအောင် တွဲလိုက်တာတော့ဟုတ်ပါတယ်။ ကိစ္စတွေပြီးလို့ တပည့်တော်ကို မခွဲနိုင်ဘူးဆိုရင်ခက်မယ်ဘုရား၊ နောက်ပြီး ပစ္စည်းဝယ်ပေးရ၊ အ၀တ်အစားဝယ်ပေးရ၊ မုန့်ဖို့ပေးရနဲ့ အကုန်အကျများမှာ”
“ အဲဒီတော့ ကျုပ်က ဘယ်လိုကူညီရမှာလဲ”
စာရေးသူ စကားဆုံးတော့ စာရေးသူဘေးနားမှာ ထိုင်နေတဲ့ ကျောင်းသားတွေကို မေ့ငေါ့ပြပြီး။
“ဟိုလေ ဘုရား .. ဘုန်းဘုန်းလေးဆီမှာ ဦးဇင်းလူထွက်လေး ဘာလေးများ ရှိလားဘုရား”
“ရှိတယ်လေ ခု ဦးဇင်းနား ထိုင်နေတဲ့ (၃) ယောက်က ဘုန်းကြီးလူထွက်တွေချည်းပဲ ဒကာမကြီး စမောဆွဲမှာနဲ့ သူတို့နဲ့က ဘာဆိုင်လို့လည်း”
“ဒီလိုပါဘုရား… ဘုန်းကြီးလူထွက် “တစ်ပါး”လောက်ကို တပည့်တော်စမောဆွဲချင်လို့ပါဘုရား…. အလကားမဆွဲပါဘူးဘုရား တရက်ကို (၁၅၀၀) ပေးမှာပါ၊ သူတို့လည်းအလုပ်ရ တပည့်တော့အတွ က်လည်းအဆင်ပြေတာပေါ့ဘုရား”
မော်ဒယ် အဖွားရဲ့ စကားလည်းကြားရော.. ဘုန်းကြီးလူထွက် (၃)ယောက်မှာ။
“ဟာ ..ဟာ…. ကျုပ်တို့က ခဏလေး လူထွက်တန်း ကစားနေတာပါ၊ ခဏနေရင် ဘုန်းကြီးပြန်ဝတ်တော့မှာပါဗျာ၊ တကယ်ပြန်ဝတ်တော့မှာပါဗျာ”
လို့ ကြောက်လန့်တကြားအော်ပြီး ကျောင်းပေါ်က ဆင်းပြေးသွားပါတော့ တယ်။
“မနက်ဖြန် ပြန်လာခဲ့မယ်ဘုရား” လို့ အကြိမ်ကြိမ်ပြော ပြီး မောဒယ်အဖွားပြန်သွားပါတယ်။
မော်ဒယ်အဖွားကြီးလည်းပြန်တော့မှ အမောတကောနဲ့ -
“ဆရာတော်ဘုရား တပည့်တော်တို့ (၃)ယောက်ကို အမြန်စုံ သင်္ကန်ပြန်ဝတ်ပေးပါဘုရား၊ ညနေက အဖွားကြီးကိုကြောက်လို့ပါ အမြန်သင်္ကန်းဝတ်ပေးပါ ဘုရား”
ဟု တစာစာနဲ့ တောင်းဆိုနေပါတော့တယ်။
အခုချိန်ထိကား သင်္ကန်ပြန်ဝတ်မပေးရသေးပါချေ၊ စမောဆွဲလိုသူ၊စနိုက်ကြော်လိုသူ “ဘုန်းကြီးလူထွက် တရက်(၁၅၀၀) နဲ့ ငှားလိုသူများ စာရေးသူထံ ဆက်သွယ်ကြပါကုန်……………
(ဘ၀အမော၊ တစ်ခဏတော့၊ ပြေလျှောကြပါစေ)
““ဓမ္မ၀ီရ အရှင်””
No comments:
Post a Comment