ဇွန်လ ၁-ရက်နေ့ကပေါ့
ကိုမိုက်ကယ်တို့ရဲ့ဆွမ်းစားကအပြန် စားသောက်ကုန်စုံဆိုင်ကြီးတစ်ဆိုင်မှာဝင်ပြီး လိုချင်တာလေးဝယ်တယ်၊ အသိ ဒကာမတစ်ယောက်နဲ့တွေ့တယ်လေ။
သူနဲ့မတွေ့တာလဲကြာပါပြီ။ "ဒကာမကြီး ၀လို့ပါလား"။ ရယ်ကာမောကာနဲ့ "မှန်ပါဘုရား"တဲ့။ "ဆရာတော်လဲ ပိန်နေတယ်"။ "ဟုတ်တယ်၊ ဖျားပြီးစမို့ပါ"လို့ လွယ်လွယ်ပဲပြောလိုက်မိတယ်။ သူကလဲ ဈေးလှည်းတွန်းလျက်၊ ပစ္စည်းတွေကလဲအပြည့်၊ ကိုယ်တို့နှစ်ပါးကလဲ ဈေးလှည်းနဲ့ပေါ့လေ။
"ဆရာတော် ကြုံတုန်း ဒီပစ္စည်းလေးတွေလှူလိုက်ပါရစေဘုရား" တဲ့။ "သာဓုပါ၊ ကျောင်းမှာလဲ အာဂန္တု ဘုန်းကြီးတွေရှိတော့ အဆင်ပြေတာပေါ့ ဒကာမကြီး"။
သူ့လှည်းထဲက ပစ္စည်း ၂-ထုပ် ကိုယ့်လှည်းပေါ်ပြောင်းတင်ပေးတယ်လေ။ ဒကာမကြီးက တကယ်စေတနာအစစ်အမှန်နဲ့လှူနေတာပါ။ သူ့မျက်နှာမှာ ရိုးသားဖြောင့်စင်းတဲ့ စေတနာတွေအထင်းသားပါ။ အလှူခံကလဲ ကျေးဇူးတင်ဝမ်းသာမိတာ အမှန်ပါ။ ဆုတွေဘာတွေပေးပြီး နှစ်ပါးသား စကားတပြောပြောနဲ့ ငွေရှင်းမယ့်ကာင်တာဆီကို သွားလိုက်ကြတယ်။
ကောင်တာပေါ် ပစ္စည်းတွေတင်မှ "ဟာ- သူလှူတာတွေ ငါက ငွေရှင်းရမှာပါလားလို့" သတိရမိတယ်။
ကိုယ့်အဖြစ်ကိုတွေးပြီး ပြုံးမိတယ်။ အဖေါ်ပါတဲ့ အာဂန္တုဘုန်းကြီးကတော့ ဟားတိုက်ပြီးရယ်တယ်လေ။
လှူတဲ့ဒကာမကတော့ ကိုယ်ပိုင်ပစ္စည်းအမှတ်နဲ့ စေတနာနဲ့ ရိုးရိုးသားသားလှူလိုက်လို့ စေတနာအကျိုးတော့ ရပြီးသားပါ။ ရယ်စရာတော့ ဖြစ်သွားတာပေါ့နော်။
သူ့ပစ္စည်းတွေ ပြန်ထုပ်မယ်စိတ်ကူးသေးတယ်။ နေပါစေတော့လေဆိုပြိး ငွေရှင်းမယ်လုပ်တုန်း ဒကာတစ်ယောက်က ဘယ်နိုင်ငံကပါလဲ၊ ဘယ်ကျောင်းကပါလဲ မေးပြီး ဒီပစ္စည်းတွေ သူလှူပါရစေ တဲ့။ သူက ဗီယက်နာမ်နိုင်ငံကပါတဲ့။
$ 50 နီးပါးကျတာကို သူကရှင်းသွားတယ်လေ။
ကံကောင်းသေးတယ်လို့ ဆိုရမှာပေါ့နော်။
ငွေရှင်းပြီး ဒကာက ဘာသာရေးမေးခွန်းတွေ မေးသေးတယ်။ စိတ်ရှည်ရှည်နဲ့ စွမ်းနိုင်သလောက်ရှင်းပြခဲ့ပါတယ်။ သူက မဟာယာန ဗုဒ္ဓဘာသာပါ။
ဖြစ်ပုံကတော့ ဆန်းလိုက်တာလို့ တွေးမိပါရဲ့
.
မြတ်ပဋ္ဌာန်း
ဇွန်လ ၂ ရက်။ ၂၀၁၆
No comments:
Post a Comment