အဲသည် ကံက နှောက်ယှက်တဲ့ကံထက်တောင် ပိုဆိုးပါတော့တယ်။
နှောင့်ယှက်ကံက အကျိုးပေးနေတဲ့ကံကို အစွမ်းလျော့သွားအောင်၊ မှိန်သွားအောင် လုပ်တာ၊ ဖြတ်မပစ်လိုက်ဘူး။
ဥပစ္ဆေဒကကံကတော့ ဖြတ်ကို ဖြတ်ပစ်လိုက်တာဗျ။
အဲသည် ကံမှန်တဲ့ လူသတ္တ၀ါမှန်သမျှ အီစလံကို ဝေသွားမှာပဲ။ မထူနိုင်၊ မထောင်နိုင်အောင်ကို ဖြစ်သွားမှာပဲ။
ဥပစ္ဆေဒက ကံပါသူဟာ သူများလက်ချက်နဲ့လည်း ရုတ်တရက် သေတတ်တယ်။ သွားရင်းလာရင်းလည်း ရုတ်တရက် သေတတ်တယ်။
လူတွေဟာ ဥပစ္ဆေဒကကံကို ကြောက်ကြပါတယ်။ ကြောက်လည်း ကြောက်စရာပါပဲ။
လူ့ဘုံဟာ ကံသက်သက်ကိုသာ ရပ်တည်ပြုနေတဲ့ ဘုံမဟုတ်ဘူး။ ဥာဏ်၊ ၀ီရိယထုတ်ရတဲ့ ဘုံဖြစ်တယ်။ အဲသည်လို ဥာဏ်၊ ၀ီရိယထုတ်ရတဲ့ ဘုံဖြစ်ပေမယ့် ဥပစ္ဆေဒကကံ ပါလာသူအဖို့မှာတော့ ဥာဏ်၊ ၀ီရိယနဲ့ရော ရှောင်လို့ ရနိုင်ပါ့မလား။
အချိန်တန်ရင် ခံရတာပဲ။
ကံတစ်ခု အကျိုးပေးနေခိုက်မှာ အခြားကံတစ်ခုက ၀င်ဖြတ်လိုက်တယ်။ အဲသည်မှာ အကျိုးပေးမှု ရပ်ဆိုင်းသွားတယ်။
အဲသည်လို ဖြတ်တဲ့ကံကို ဥပစ္ဆေဒကကံလို့ ခေါ်တယ်။ ရှင်မဟာမောဂ္ဂလာန်ဟာ ကောင်းကျိုးရနေတဲ့ ဘ၀မှာ နောက်က အကုသိုလ်ကံက သူ့ဘ၀ကို လာဖြတ်တောက်ပစ်လိုက်တယ်။
ရှေးဘ၀က အမိအဖကို သတ်ခဲ့တဲ့ အကုသိုလ်က ကောင်းကျိုးရနေတဲ့ ဘ၀ကို လာဖြတ်တာပဲ။ ခိုးသားငါးရာရဲ့ ရက်စက်မှုကို ခံရတာပဲ။
ဖြတ်တောက်လိုက်တဲ့ ကံက အကျိုးပေးဆဲ ကံကို ရပ်ကိုရပ်ဆိုင်းပစ်လိုက်တယ်။
အကျိုးပေးဆဲကံရဲ့ အကျိုးပေးမှု ရပ်ဆိုင်းလိုက်တဲ့အခါ အခြားကံတစ်ခု နေရာယူလာတယ်။ အဲသည်လိုမှ မဟုတ်ရင် ဖြတ်ကံ၊ ဖျက်ကံက ဆက်ပြီး နေရာယူသွားတာပဲ။
အဲသည် ဖြတ်ရာ၊ ဖျက်ရာမှာလည်း ကုသိုလ်ကံနဲ့ အကုသိုလ်ကံ နှစ်မျိုးရှိတယ်။
အချို့ဆို ကုသိုလ်ကံက အကျိုးပေးနေစဉ် အကုသိုလ်ကံက ဖြတ်ပစ်လိုက်တယ်။
အချို့ဆို အကုသိုလ်ကံက အကျိုးပေးနေစဉ် ကုသိုလ်ကံ ဖြတ်တာလည်း ရှိပြန်တယ်။
နောက်က အကုသိုလ်တွေ များလွန်းလှပြန်ရင်လည်း ရှေ့ကျမှ လုပ်တဲ့ ကုသိုလ်ကံတွေကို ဖြတ်တောက်ပစ်တာပါပဲ။
အကျိုးမပေးရသေးတဲ့ ကံအချင်းချင်းလည်း ရေများရေနိုင်၊ မီးများ မီးနိုင် စနစ်အရ တစ်ခုကိုတစ်ခု ဖြတ်တောက်ပစ်တယ်။
ဥပစ္ဆေဒကကံဆိုတာကလည်း ဘ၀ဟောင်းက ကိုယ်မွေးမြူလို့ ရထားခဲ့တာပါ။
နောက်ဘ၀တွေမှာ ဥပစ္ဆေဒကကံ မဖျက်မဖြတ်နိုင်အောင် အကုသိုလ်ကံတွေ မပြုဖို့ အရေးကြီးလှပါတော့တယ်။
အကောင်းအဆိုး၊ အကျင့်မျိုးကား
ဖြစ်ကျိုးပေးနေ၊ ရှိမြဲပေတည်း
နဘေဥမင်၊ ပင်လယ်ပြင်၌
အောင်းဝင်ပျံတက်၊ ကံဝိပါက်မှ
လွတ်ကွက်လွတ်ရာ၊ မရှိစွာခဲ့။ (မဃဒေ၀-၂၃)
သုတေသီ ဘုန်းမြင့်သွေး ရေးသားသော ..ကံသာအမိ ကံသာအဖ နှင့် ကံကြမ္မာဖြစ်ရပ်ဆန်းများ.. စာအုပ်မှ ရေးသားမျှဝေပါတယ်။
No comments:
Post a Comment