--------------------------------------------------------------
အရိယာဇာတ် မြတ်သောဓမ္မဓာတ် ကိန်းလေပြီးသူ သူတော်ကောင်း အစားစားတို့၌ ထိုကိစ္စအားလုံး အတွင်းသားလှိုက်၍ ကြည့်မြင်တတ်ပေပြီ။ လူဆိုးတွေ့လျှင် မိုက်နေတာသူမဟုတ်၊ သူ့အထဲကဒေါသ၊ လူကောင်းတွေ့လျှင် လိမ္မာနေတာ သူမဟုတ် အထဲကပညာဉာဏ်၊ သည်လိုကိုယ်ပိုင်သိဖြင့် ကွဲသိနေသော
ကြောင့် လူကိုရန်သူလိုမမြင်၊ သူ့ထံကိန်း ကိလေသာ ရန်သူအသွင် မြင်တော့၏။ ကိလေသာကို ချေဖျက်ပေး၍ လူကိုကား ဘေးလွတ်ရာ ကယ်တင်ပေး၏။
ထိုသူတော်ကောင်းမျိုး၌ ကိုယ်မတုန်တော့သဖြင့် စိတ်မလှုပ်၊ စိတ်မလှုပ်တော့ သဖြင့်လည်း ကိုယ်မလှုပ်၊ လောကဓံကို မဖြုံတော့ချေ။
‘စိုးရိမ်ပူဆွေး ငိုကြွေးခြင်းလည်း မရှိစေနှင့်’
-----------------------------------------------
မိမိကိုယ်ကို ပြန်ကြည့်လိုက်တော့လည်း ငါဟူသည်ကို ရှာမတွေ့၊ ကံမျိုးစေ့ ပစ်ချမှုကြောင့် အစွဲရိပ်ချည်းသာ၊ စေတနာအရှိန်အားအတိုင်း ကြီးထွားတိုးတက် အပျက်မှအပျက်သို့ ဆက်နေသည်ကိုသာ တွေ့ရတော့၏။
ထိုသူတော်ကောင်းမျိုး၌ မိမိသေရမည်ကိုလည်းကောင်း၊ ဘေးဒုက္ခရောက်ရမည်ကိုလည်းကောင်း နည်းနည်းလေးမှစိုးရိမ်မှုမရှိ၊ အကယ်တိတိ သူတစ်ပါးက ရန်သူထင်သဖြင့် သုတ်သင်ရန်လာသော်မှ သနားမိချေသေး၏။ ‘သြော်... သူ မသတ်သော်လည်းသေမှာ၊ သူသတ်လည်း သေမှာချည်းဟာ အလကားသက်သက် ဓားခုတ်ရာ လက်ဝင်လျှိုတဲ့ သတ္တဝါလေးပဲ’ဟူ၍ သနားစိတ်ပိုမိချေသေး၏။
‘ချဉ်ခြင်းတက်မက် ထိုရမ္မက်လည်း မရှိစေနှင့်’
---------------------------------------------------
တစ်ဖန်အပြင်ကနေ နေ့စဉ်သွင်းပေးသည်မှာ (အစားအစာများ) ပုပ်ကုန် သိုးကုန်တွေချည်း၊ မိမိကိုမွေးထုတ်ပေးလိုက်ကြသော မိဘတွေကလည်းပဲ အညှီအပုပ်သာ ပေးလိုက်နိုင်ကြပြီး အကောင်းဟူ၍ ဘာတစ်ခုမျှ မပေးလိုက်ကြ။ သို့ကြောင့် ခန္ဓာတစ်ပြင်လုံး တင့်တယ်သောအသွင် ဘာတစ်ခုမျှ မတွေ့ရပြီ။ သွင်းလိုက်သော အပုပ်တို့မှ စီးဆင်းဖြစ်ပွားနေကြသော အပုပ်အညှီများနှင့် မလိုအပ်
တော့သဖြင့် ဒွါရအားလုံးတို့မှ ယိုစီးထွက်လာသော အပုပ်တို့ချည်းသာ အရှိအရှိအတိုင်း ဒီဋ္ဌပက်ပင်း တွေ့မြင်နေရချေ၏။
ထိုသူတော်ကောင်းမျိုး၌ မိမိကိုယ်ကို ခင်မင်လိုသော စိတ်မရှိ။ ငါကောင်းစားရန် သိမ်းပိုက်မည်ဟူ၍လည်းကောင်း၊ သူချမ်းသာရန် ဆက်ဆံမည်ဟူ၍လည်းကောင်း၊ နှစ်ဦးကြား၌ ကိလေသာ လမ်းသလားခြင်း မရှိတော့ချေ။
အကယ်တိတိ မသိသူက စသော်မှ သနားစိတ်ဖြင့် ‘သြော်... တစ်ဖက်သား ဒုက္ခ အလကားသက်သက် ဝင်စွက်လိုတဲ့သူလေးပဲ’ ဆိုကာ နှစ်သိမ့်ပေးတတ်ချေသေး၏။
မဟာဗောဓိမြိုင်ဆရာတော်
Buddhavasa Tiloka
No comments:
Post a Comment