ဒီနေ့နာလိုက်ရတဲ့ တရားတော်ထဲမှ သိမှတ်စရာလေးတစ်ခု

ကံအမိ ကံအဖနဲ့သေရင် စိတ်မချရဘူး။ ဥာဏ်မပါလို့ ရှိရင်လေ… ကုသိုလ်ကောင်းမှုတွေတော့ လုပ်နေတာပဲ… နေ့တိုင်းကို လုပ်နေတာ။ ကုသိုလ်ကောင်းမှုရှင်တွေပဲကွာ… သေရင် နတ်ပြည်ကတော့ ကျိန်းသေမှာပေါ့လို့ ပြောလို့ရပါ့မလား။
မရပါဘူးဘုရား။
အင်း… အဲဒါ… အဲဒါသိဖို့ပဲ။
သာသနာပကာလတုန်းက ဈာန်ရတဲ့ရသေ့တွေ အယူမှားကြပုံတွေ အများကြီးကို ကမ္မ၀ိဘင်္ဂသုတ်မှာ မြတ်စွာဘုရား အကျယ်ကြီးဟောထားတာ။ ဟိုးတုန်းက ဈာန်ရတဲ့ရသေ့တွေ သူတို့တန်ခိုးနဲ့ ကြည့်လိုက်တော့ နတ်ပြည်မှာ နတ်သား၊ နတ်သမီးတွေ ချမ်းသာတယ်။ ဒီနတ်သား၊ နတ်သမီးတွေ… နတ်သားတစ်ယောက်ပေါ့လေ… ဒီနတ်သား လူ့ပြည်မှာတုန်းက ဘာလုပ်ခဲ့လဲ ကြည့်လိုက်တဲ့အခါ… ဟာ ဒီနတ်သား လူ့ဘ၀တုန်းက ကုသိုလ်ကောင်းမှုတွေ လုပ်ခဲ့တာကိုး။ အဲဒီတော့ ကုသိုလ်ကောင်းမှုတွေလုပ်ပြီးသေရင် နတ်ပြည်ရောက်တယ်ဟေ့… အဲဒီအတိုင်းဟောတာ။ နောက်တော့ နောက်ဈာန်ရတဲ့ ရသေ့တစ်ယောက်က သူ့တန်းခိုးအဘိဥာဏ်နဲ့ ကြည့်လိုက်တယ်။ နတ်ပြည်မှာ နတ်သား၊ နတ်သမီးတွေ… အော် ချမ်းသာလိုက်တာ။ လူ့ပြည်မှာတုန်းက ဘာလုပ်လဲ ကြည့်လိုက်တော့… ဟာာ.. အကုသိုလ်တွေ လုပ်နေတာမြင်တယ်။ အဲဒီတော့ သူက သဗ္ဗေညုတဥာဏ်မှ ရတာမှ မဟုတ်ဘဲ… အဲဒီတော့ သူက ဘယ်လိုဟောလဲဆိုတော့ အကုသိုလ်လုပ်တဲ့သူတွေက သေရင် နတ်ပြည်ရောက်တယ်။ ဒီလိုဟောတာ… တန်ခိုးအဘိဥာဏ်တွေက ဥာဏ်မပါလို့ရှိရင် အရမ်းကြောက်ဖို့ကောင်းတယ်။ သူတို့ကတော့ အမှန်အတိုင်း ဟောတာပဲလေ။ ဒါပေမယ့် သူတို့မှာ သဗ္ဗေညုတဥာဏ်မရှိတော့ စုတိပြတ်ကြွေ သေခါနီးကာလမှာ ဘယ်လိုဖြစ်သွားတယ်။ ဘယ်လိုကံတွေက စီမံတယ်ဆိုတဲ့ ကံရဲ့သဘောကို အကျယ်မသိဘူး။ အခုလောလောဆယ် ဖြစ်တာလေးပဲ သူတို့သိတာ။

ဇွန်လ ၁ ရက်၊ ၂၀၁၄ မှာ ဟောကြားတော်မူသော မြစိမ်းတောင် ဆရာတော်ဘုရားရဲ့ တရားတော်မှ သိမှတ်စရာလေးတစ်ချက်

တန်ခိုးတွေ၊ ဈာန်အဘိဥာဏ်တွေဆိုတာ သာသနာပကာလမှာလည်း ရှိပါတယ်။ တန်ခိုးတွေ၊ ဈာန်အဘိဥာဏ်တွေရှိတိုင်း အမှန်အတိုင်းသိကြ၊ မြင်ကြတာ မဟုတ်ပါဘူး။ ဥာဏ်မရထားသေးရင် ပိုလို့တောင် ကြောက်ဖို့ကောင်းပါသေးတယ်။ မြတ်စွာဘုရား မပွင့်ပေါ်ခင်တုန်းက ဒီလိုပဲ အလွဲလွဲအချော်ချော် ကမောက်ကမတွေချည်းပါပဲ။ ဈာန်တန်ခိုးတွေ ဘယ်လောက်ပဲရရ ကျယ်ဝန်းပြီး နက်နဲလှတဲ့ ကံတွေရဲ့သဘောသဘာဝကို လုံးစေ့ပတ်စေ့ နားမလည်ကြတဲ့အတွက် အမှားတွေဟော၊ အမှားတွေ ထင်၊ အမှားတွေ လုပ်မိကြတာပါပဲ။ မြတ်စွာဘုရား ပွင့်ထွန်းပေါ်ပေါက်လာပြီး သစ္စာတရားတွေ ဟောကြားပြသလို့သာ အမှန်တရားအစစ်တွေကို သိခွင့်၊ မြင်ခွင့် ရကြရတာပါ။ ဒါတွေ သိမြင်ကြားနာရတဲ့အခါ မြတ်စွာဘုရားကို ပိုပြီးတော့ ကြည်ညိုမိပါတယ်။

ဟိုးတုန်းကတော့ ဈာန်တွေ၊ တန်ခိုးတွေ၊ မဂ်ဥာဏ်၊ ဖိုလ်ဥာဏ်တွေကို အရောရော အနှောနှော လုံးထွေးပြီး နားလည်နေခဲ့တယ်။ တကယ်တမ်းတော့ မဂ်ဥာဏ်၊ ဖိုလ်ဥာဏ် အဆင့်ဆင့်တက်ဖို့အတွက်က ဥာဏ်လမ်းကြောင်းကို လျှောက်ရမယ်။ တန်ခိုး၊ အဘိဥာဏ်တွေရဖို့ကကျတော့ ဈာန်လမ်းကြောင်းကို လျှောက်ရမယ်။ သက်သက်စီဆိုတာ နားလည်လာတယ်။ ရဟန္တာဖြစ်တိုင်းလည်း တန်ခိုးအဘိဥာဏ် ရှိချင်မှရှိမယ်။ တန်ခိုးရဖို့အတွက်က သက်သက်ကျင့်ရမှာပဲ။ တန်ခိုးရှိတဲ့ ပုဂ္ဂိုလ်တွေကလည်း မဂ်ဥာဏ်၊ ဖိုလ်ဥာဏ် ရချင်မှရမယ်။ မဂ်ဥာဏ်၊ ဖိုလ်ဥာဏ်လည်းရ၊ တန်ခိုးလည်းရှိတဲ့ ပုဂ္ဂိုလ်တွေလည်းရှိတယ်။ တန်ခိုးချည်းပဲ သက်သက် ရနေတဲ့ ပုဂ္ဂိုလ်တွေလည်းရှိတယ်။ တန်ခိုးက တန်ခိုးသက်သက်၊ မဂ်ဥာဏ်၊ ဖိုလ်ဥာဏ်က မဂ်ဥာဏ်၊ ဖိုလ်ဥာဏ်သက်သက်ပါပဲ။ အခုတော့ ဆရာတော်ဟောတဲ့ ဒီအချက်ကလေးက ပိုပြီးရှင်းလင်းသွားစေပါတယ်။ ဈာန်အဘိဥာဏ်တွေရဲ့ အတိမ်အနက်ကို ကွက်ကွက်ကွင်းကွင်း သိခွင့်ရလိုက်တဲ့အတွက်လည်း ဟောကြားပေးတဲ့ မြစိမ်းတော်ဆရာတော်ဘုရားကို ကြည်ညိုလေးစားမိပါတယ်။ တရားတစ်ပုဒ်လေးသာဆိုပေမယ့် နာခွင့်ရလိုက်တဲ့အခါမှာ ရရှိလာတဲ့ တရားအသိဥာဏ် ဗဟုသုတတွေဟာ အကျိုးများလွန်းလှပါတယ်။

Favorite Collections မှ ဆရာတော်ဟောထားတဲ့ ဗီဒီယိုကို ပြန်နာပြီး စကားလုံးတိုင်း အတိအကျဖြစ်အောင် ပြန်ရေးသားပူဇော်ပါတယ်။ အောက်ဆုံးနှစ်ပိုဒ်ကတော့ Favorite Collections နားလည်သွားသလို ပြန်ရေးသားမျှဝေထားတာပါ။ မှားတာပါသွားရင်လည်း ထောက်ပြပေးနိုင်သလို ထပ်ဖြည့်စရာရှိရင်လည်း တရားဗဟုသုတအနေနဲ့ ဝေမျှပေးသွားနိုင်ပါတယ်...

အောက်ကလင့်ခ်လေးမှာ ဆရာတော်ရဲ့ တရားတော်ကို နာယူနိုင်ကြပါတယ်။

http://www.youtube.com/watch?v=3VXgAiALmrg&feature=share

မေတ္တာဖြင့်...
Favorite Collections
(June 2, 2014: Monday)

* * * * * * *