အတင်းပြောခြင်းရဲ့ ရလာဒ်

အမေး။ ။ အရှင်ဘုရား . . .
လူ့ပတ်ဝန်းကျင်မှာအတင်းပြောတတ်တဲ့ အကျင့်ဟာ
လူမှုရေးအရ နှာခေါင်းရှုံ့ချင်စရာ ဖြစ်နိုင်ပေမယ့် ဆေးပညာအရတော့
မိန်းကလေးတွေအတွက် အကျိုးထူးတွေ ရစေနိုင်တယ်လို့ ဆိုပါတယ်။
ဘာဖြစ်လို့လဲဆိုတော့ မစ်ချီဂန်တက္ကသိုလ်က ပညာရှင်တွေက
အတင်းပြောတာဟာ မိန်းကလေးတွေကို ပိုပြီးကျန်းမာစေသလို ၊
ပိုပြီးလဲ ပျော်ရွှင်စေတယ်လို့ ဖော်ထုတ်တွေ့ရှိခဲ့လို့ပါပဲ။
သုတေသီတွေရဲ့ အပြောအရတော့ အတင်းပြောတဲ့
မိန်းကလေးတွေရဲ့ ခန္ဓာကိုယ်မှာ progesteroneလို့ခေါ်တဲ့
ဟိုမုန်းတစ်မျိုး ပုံမှန်ထက် အများကြီးပိုပြီး ထွက်လာတတ်ပြီး
အဲဒီဟိုမုန်းဟာ လူတစ်ယောက် ချင်းစီရဲ့ စိတ်ဖိစီးမှု ဝေဒနာကို
သိသိသာသာ လျော့ပါးစေပါတယ်တဲ့။
မစ်ချီဂန်တက္ကသိုလ်က ပညာရှင်တွေဟာ ကျောင်းသူပေါင်း
(၁၆၀)လောက်ကို အတွဲလိုက်သတ်မှတ်ပေးပြီး
လေ့လာကြည့်တဲ့အခါမှာ အတင်းအဖျင်းပြောရင်း
ဗဟုသုတဖလှယ်ကြတဲ့ မိန်းကလေးတွေက စကားနည်းပြီး
အတင်းပြောရတာ ၀ါသနာမပါတဲ့ မိန်းကလေးတွေထက်
ကျန်းမာရေးကောင်းပြီး ပျော်ရွှင် တက်ကြွနေ တယ်ဆိုတာကို
ဖော်ထုတ်နိုင်ခဲ့ကြတယ်။
တပည့်တော်များ သိချင်တာက အတင်းပြောတာနဲ့
ပတ်သက်ပြီး ဘာသာရေးရှုထောင့်က ဘယ်လိုဖြေမလဲဆိုတာ
သိချင်ပါတယ်ဘုရား။
(သန်းသန်းအေး၊ရန်ကုန်)

အဖြေ။ ။ဒီအတိုင်းဆိုရင်တော့ ကျန်းမာရေးကောင်းအောင် ၊
ပျော်ရွှင်အောင် အားအားရှိ သူတစ်ပါး အတင်းပဲ
လိုက်ပြောရမလို ဖြစ်နေပြီ။
သူတစ်ပါးအတင်းပြောရရင် ပျော်ရွှင်ကြတာဟာ
ပုထုဇဉ်တို့ရဲ့ သဘာဝပါ။ (ပါပသ္မိံ ရမတိ မနော) စိတ်ဟာ
မကောင်းမှုမှာပဲ မွေ့လျော်တတ်တယ် လို့ ဆိုတဲ့အတိုင်း
မကောင်းမှုမှာ မွေ့လျော်နေရတယ် ဆိုရင် ပျော်ရွှင်နေကြတာဟာ
သဘာဝပါ။

အတင်းပြောတယ်ဆိုတာ သူများအကြောင်းတွေကို
ကောင်းတာရော၊ မကောင်းတာရော အစုံပါတာဆိုတော့
ကောင်းတာနဲ့ မကောင်းတာ နှစ်မျိုးခွဲရ လိမ့်မယ်။
သူတစ်ပါးအကျိုးကို လိုလားပြီး ပြောတာဆိုရင်
ကောင်းတာပြောတာပါပဲ။ ဒါဆိုရင်တော့ ဘာသာရေး
ရှုထောင့်ကနေကြည့်ရင် အပြစ်မရှိပါဘူး။
ကုသိုလ် တောင်ရပါသေးတယ်။ ပြောသာပြောရတာပါ၊
အတင်းပြောကြတယ်ဆိုမှတော့ မကောင်းတာပဲ
များဖို့သေချာနေပါတယ်။ ကောင်းတာကတော့
အနည်းအကျဉ်း လောက်ပဲ ရှိမှာပါ။

သူတစ်ပါးအကြောင်း မကောင်းပြောတဲ့အခါမှာ
“မခံချင်စိတ်၊ မနာလိုစိတ်၊ သ၀န်တိုစိတ် ၊ ပူပန်စိတ်တွေ”နဲ့
ပြောကြမယ်ဆိုရင် “အကုသိုလ်”လို့ ဆိုရမှာပေါ့။
ဘုရားရှင်က ဒုစရိုက်တရား (၁၀)ပါးရှိတယ်လို့
မိန့်တော်မူထားခဲ့ပါတယ်။
ဒုစရိုက်ဆိုတာ ဒုစရိတ= “မကောင်းသဖြင့် ကျင့်ခြင်း”လို့
အဓိပ္ပါယ်ရပါတယ်။ ဒီအထဲမှာ ကိုယ်နဲ့ မကောင်းတာကို
ပြုတာ၊ နှုတ်နဲ့ မကောင်းတာကို ပြောတာ၊
စိတ်နဲ့ မကောင်းတာကို ကြံတာရယ် လို့ သုံးမျိုးခွဲခြားထားပါတယ်။

သုံးမျိုးအနက် စကားပြောတာနဲ့ပတ်သက်ပြီး
မကောင်းပြောတာက လေးမျိုး ရှိတယ်။
ဒါကို ၀စီဒုစရိုက်လေးပါးလို့ ခေါ်ပါတယ်။
ဒီလေးပါးကို မြန်မာလိုပဲ ပြောရအောင်ပါ။
၁။ သိလျက်နဲ့ လိမ်လည်ပြောဆိုခြင်း။
၂။ ကြမ်းတမ်းစကားပြောဆိုခြင်း။
၃။ အနှစ်သာရမရှိတဲ့ စကားကို ပြောဆိုခြင်း။
၎။ အချင်းချင်းမညီညွတ်အောင် ရန်တိုက်ပြောဆိုခြင်း တို့ ဖြစ်ပါတယ်။

၁။လိမ်ပြောတယ်ဆိုတာက သိလျက်နဲ့ သူတစ်ပါးအကျိုးယုတ်အောင် ၊
နစ်နာသွားအောင် လိမ်လည်ပြောဆိုတာကို ဆိုလိုတာပါ။
တစ်ခုတော့ရှိ တယ်။သူတစ်ပါးအကျိုးကို ငဲ့ပြီး ပရိယာယ်နဲ့
ပြောဆိုတာကျတော့ မုသာဝါဒလို့ မခေါ်ပါဘူး။
၂။ညင်သာစွာ ပြောဆိုရမဲ့နေရာမှာ ညင်သာစွာ မပြောဘဲ
သူတစ်ပါးနား မချမ်းသာအောင် “ကြမ်းတမ်းတဲ့စကား”
ပြောဆိုတာကို ဆိုလိုတာပါ။

၃။အနှစ်မရှိတဲ့စကားပြောတယ်ဆိုတာက လောကကောင်းကျိုး၊
လောကုတ် ကောင်းကျိုးကြည့်ပြီး ပြောကြတာကို မဆိုလိုပါဘူး။
ဘာအကျိုးအမြတ်မှ မရှိဘဲ အနှစ်မရှိ ပြိန်ဖျင်းတဲ့စကား
ပြောတာကို ဆိုလိုတာပါ။

၎။ဂုံးတိုက်တယ်ဆိုတာက ညီညွတ်နေတာကို မမြင်ချင်လို့
မညီညွတ်အောင် ရန်တိုက်ပေးတဲ့ စကားပြောတာကို ဆိုလိုတာပါ။
ဒီလိုပါပဲ အတင်းပြောတဲ့အခါ အထက်ပါ ၀စီဒုစရိုက်လေးမျိုးထဲ
ပါနေရင်တော့ အကုသိုလ်ဖြစ်တဲ့အတွက် ရှောင်သင့်ပါတယ်။
တကယ်လို့ ၀စီဒုစရိုက်လေးပါးမဟုတ်ဘဲ
ဝစီသုစရိုက် လေးပါးထဲ ပါဝင်နေတယ်ဆိုရင်တော့
ကုသိုလ်ဖြစ်တယ်လို့ ဆိုရမှာပါ။

ဘုရားရှင်က ကောင်းတဲ့စကားပြောခြင်းဟာ
“သုဘာသိတ မင်္ဂလာ” နဲ့ပြည့်စုံ တယ်လို့ဆိုထားတဲ့အတွက်
စကားပြောရင် ကောင်းတဲ့စကားပဲ ဖြစ်ဖို့ သတိထား ရပါ့မယ်။
အလျဉ်းသင့်တုန်း စကားပြောတာနဲ့ ပတ်သက်ပြီး မှတ်သားဖွယ်
လင်္ကာ တစ်ခုကို ဖေါ်ပြပါဦးမယ်။

“စကားခြောက်ခွန်း၊ လူ၌ထွန်း၊
လေးခွန်းကိုပယ်၊ နှစ်ခွန်းတယ်” တဲ့။ အဓိပ္ပါယ်က…
၁။ မမှန်စကား၊ ကျိုးမပွား၊ ကြားသူမနှစ်သက်။
၂။ အမှန်ပြောကြား၊ ကျိုးမပွား၊ ကြားသူမနှစ်သက်။
၃။ အမှန်ပြောကြား၊ အကျိုးများ၊ ကြားသူမနှစ်သက်။
၎။ မမှန်စကား၊ ကျိုးမပွား၊ ကြားသူလွန်နှစ်သက်။
၅။ အမှန်ပြောကြား၊ ကျိုးမပွား၊ ကြားသူလွန်နှစ်သက်။
၆။ အမှန်ပြောကြား၊ အကျိုးများ၊ ကြားသူလွန်နှစ်သက်။

ဒီစကား ခြောက်ခွန်းထဲမှာ နံပါတ်(၃)နဲ့နံပါတ်(၆)က
အကျိုးရှိတဲ့ စကား ဖြစ်သလို ၊သုဘာသိတမင်္ဂလာလည်း
ဖြစ်တယ်ဆိုတာပြောရင်း စာဖတ်သူအပေါင်း
ကောင်းသောစကားကိုသာ ပြောဆိုရင်း
ကျန်းမာပျော်ရွှင်အောင် နေတတ်ကြပါစေ။

-【ဦးကောဝိဒ(မြိတ်)】

Photo Credit To : Ko Aung Kyaw Khin
Dhamma Dãna Source ►
www.facebook.com/youngbuddhistassociation.mm