မြတ်စွာဘုရားရှင်၏ အဂ္ဂိဈာပန နှင့် ဓာတ်တော်

မီးသဂြိုလ်ခံရတဲ့ ဘုရားရှင်ရဲ့ အရေထူ အရေပါး အသား အကြော အစေးတွေဟာ ပြာအဖြစ် မထင်ရှား မီးသွေးအဖြစ် မထင်ရှားခဲ့ပါ..
ဓာတ်တော်တွေသာ ကြွင်းကျန်ခဲ့ပါတယ်..
ထောပတ်ဆီတွေကို မီးလောင်တဲ့အခါ ပြာ မီးသွေး မကျန်ရှိသလိုပါပဲ..

ဘုရားရှင်ရဲ့ ခန္ဓာကိုယ်တော်ကို ရစ်ပတ်ထားတဲ့ ဝတ်စုံငါးရာထဲက အောက်ဆုံးဝတ်စုံနဲ့ အပေါ်ဆုံးဝတ်စုံကို မီးမလောင်ပါဘူး..
ဘုရားရှင်ရဲ့ကိုယ်တော်ကို မီးလောင်ပြီးတဲ့အခါ ကောင်းကင်မှ ရေအလျဉ်တွေဖြစ်ပေါ်လာကာ ဘုရားရှင်ရဲ့ထင်းမီးပုံကို ငြိမ်းစေကြပါတယ်..
အင်ကြင်းပင်တွေရဲ့ ပင်စည်ကြား သစ်ခွကြားတွေမှလည်း ရေများထွက်လာကာ ငြိမ်းစေကြပါတယ်..
ကုသိနာရုံ မလ္လာမင်းတွေကလည်း နံ့သာရည်တွေနဲ့ ငြိမ်းစေကြပါတယ်..

မလ္လာမင်းတွေက ဘုရားရှင်ရဲ့ဓာတ်တော်တွေကို ၇-ရက်ပတ်လုံး လှံကိုင်ထားသူတွေကို ဝိုင်းရံထားစေကြပါတယ်..
ဆင်တွေ ဦးကင်းချင်းထိနေအောင်
မြင်းတွေ လည်ပင်းချင်းထိနေအောင်
ရထားတွေ အစွန်းချင်းထိနေအောင်
စစ်သည်တော်တွေ ပခုံးချင်းထိနေအောင် ဝိုင်းရံထားစေကြပါတယ်..
အဲဒါတွေရဲ့အဆုံးမှာ အစွန်းချင်းထိနေတဲ့ လေးတွေကို ဝိုင်းရံထားကြစေပါတယ်..
အက အတီး အမှုတ် ပန်းနံ့သာတွေနဲ့ အရိုအသေ အလေးအမြတ်ပြုကြ မြတ်နိုးကြ ပူဇော်ကြပါတယ်..

ဘုရားရှင်၏ ကြွင်းကျန်ခဲ့သော ဓာတ်တော်အကြီးစားက ပဲနောက်စေ့ ပမာဏ ရှိပါတယ်..
အလတ်စားက ဆန်ကျိုး ပမာဏ ရှိပါတယ်..
အငယ်စားက မုန်ညင်းစေ့ ပမာဏ ရှိပါတယ်..
အကြီးစားဓာတ်တော်က ရွှေအဆင်း
အလတ်စားဓာတ်တော်က ပုလဲအဆင်း
အငယ်စားဓာတ်တော်က ချရားငုံအဆင်း ရှိပါတယ်..
အကြီးစားနှင့် အလတ်စားဓာတ်တော်က ၅ ကွမ်းစားစီရှိပြီး
အငယ်စားဓာတ်တော်က ၆ ကွမ်းစား ရှိပါတယ်..
ဓာတ်တော်တွေဟာ ၁၆ စိတ် ရှိပါတယ်..

အဇာတသတ်မင်းရဲ့ မဂဓတိုင်း ဝေသာလီပြည် ကပိလဝတ်ပြည် အလ္လကပ္ပပြည် ရာမရွာ ဝေဋ္ဌဒီပကပြည် ပါဝေယျကပြည် ကုသိနာရုံပြည် ဒီ ၈-ပြည်မှာ ဘုရားရှင်ဓာတ်တော် တစ်စိတ်စီတည်ရှိပါတယ်..
ဘုရားရှင်ရဲ့ဓာတ်တော်စေတီ ၈-ဆူ တည်ထားပူဇော်ကြပါတယ်..
ဒေါဏပုဏ္ဏား(ဘုရားရှင်၏ဓာတ်တော်များ ခွဲဝေပေးသူ)က ဓာတ်တော်ခြင်တဲ့အိုးကိုယူကာ စေတီတည်ထားပူဇော်ပါတယ်..
မောရိယမင်းတွေက မီးသွေးကိုယူကာ စေတီတည်ထားပူဇော်ကြပါတယ်..

စွယ်တော် ၄-ဆူက တာဝတိံသာနတ်ပြည်
နဂါးပြည် ကာလိင်္ဂမင်းရဲ့တိုင်းပြည်
ဂန္ဓာရအရပ်တွေမှာ တစ်ဆူစီတည်ရှိပါတယ်..
၄၀-သော သွားတော် ဆံတော် အမွေးတော်တွေကို စကြာဝဠာတစ်ပါးတစ်ပါးဆီသို့ နတ်တွေက ပို့ဆောင်ကြပါတယ်..

ဘုရားရှင်ရဲ့ နဖူးသင်းကျစ်တော်က သီဟိုဠ်ကျွန်းမှာ
လက်ဝဲညှပ်ရိုးတော်က ဗြဟ္မာ့ပြည်မှာ
လက်ယာညှပ်ရိုးတော်က သီဟိုဠ်ကျွန်းမှာ တည်တော်မူပါတယ်..

ဘုရားရှင်ရဲ့ သပိတ် သင်္ကန်း တောင်ဝှေးတော်တွေဟာ ဝဇိရပြည်မှာတည်ရှိပါတယ်..
သင်းပိုင်က ကုလဃရပြည်မှာ
အပေါ်အခင်းက သီလပြည်မှာ
ဓမကရိုဏ်နဲ့ ခါးပန်းကြိုးက ပါဋလိပုတ်ပြည်မှာ
ရေသနုပ်က စမ္ဗာပြည်မှာ
ဥဏ္ဏလုံးမွေးရှင်တော်က ကောသလ္လတိုင်းမှာ
သင်္ကန်းက ဗြဟ္မာ့ပြည်မှာ
ဦးရစ်တော်က တာဝတိံသာနတ်ပြည်မှာ
နိသိဒိုင်က အဝန္တိတိုင်းမှာ
မြေခင်းနှီးက ဒေဝတိုင်းမှာ
မီးပွတ်တော်က မိထိလာပြည်မှာ
ရေစစ်က ဝေဒေဟတိုင်းမှာ
ပဲကွပ်နဲ့အပ်ကျည်က ဣန္ဒပတ္တနပြည်မှာ
ကြွင်းတဲ့ ပရိက္ခရာတွေက အပရန္တဇနပုဒ်မှာ တည်ရှိကြပါတယ်..

သာသနာဆုတ်ယုတ်ရာအခါမှာ သီဟိုဠ်ကျွန်းက ဓာတ်တော်တွေဟာစုပြီး မဟာစေတီကို ကြွလာကြပါလိမ့်မယ်..
မဟာစေတီမှ နာဂဒီပရှိ ရာဇာယတနစေတီကို ကြွသွားကြပါလိမ့်မယ်..
ရာဇာယတနစေတီမှ မဟာဗောဓိပလ္လင်ကို ကြွသွားကြပါလိမ့်မယ်..
ပြန့်ကျဲနေသောအလုံးစုံသော ဓာတ်တော်တွေဟာ မဟာဗောဓိပလ္လင်ကိုပဲ ကြွကြပါလိမ့်မယ်..
မုန်ညင်းစေ့လောက်ရှိတဲ့ဓာတ်တော်တောင်မှ အကြားမှာ မပျောက်မပျက်ပဲ ရှိပါလိမ့်မယ်..
ဓာတ်တော်အားလုံး မဟာဗောဓိပလ္လင်မှာစုကာ ရွှေစိုင်ခဲပမာ အစိုင်အခဲဖြစ်ပြီး ရောင်ခြည်တော် ၆-ပါးကို လွှတ်ကြပါလိမ့်မယ်..
အဲဒီရောင်ခြည်တွေဟာ လောကဓာတ်တစ်သောင်းကို ပျံ့နှံ့ကြပါလိမ့်မယ်..

အဲဒီနောက် စကြဝဠာတစ်သောင်းက နတ်တွေဟာ စုဝေးပြီး
"ဒီနေ့ ဘုရားပရိနိဗ္ဗာန်စံဝင်တယ်.."
"ဒီနေ့ သာသနာဆုတ်ယုတ်တယ်.."
"အခု ငါတို့ဖူးတွေ့ရတာဟာ နောက်ဆုံးဖူးတွေ့ရတာပဲ.."လို့
ပြောကာ ဘုရားရှင်ခန္ဓပရိနိဗ္ဗာန်စံတော်မူသွားခဲ့တဲ့နေ့ကထက်
ပိုပြီး ကရုဏာကို ပြုကြပါလိမ့်မယ်..
အနာဂါမ် ရဟန္တာမှတစ်ပါး ကျန်ပုဂ္ဂိုလ်တွေက ပုံမှန် မရပ်တည်နိုင် ဖြစ်ကြပါလိမ့်မယ်..

ဓာတ်တော်တွေမှ တေဇောဓာတ်ဖြစ်ပေါ်လာပြီး ဗြဟ္မာ့ပြည်တိုင်အောင် တက်သွားပါလိမ့်မယ်..
မုန်ညင်းစေ့လောက်ဓာတ်တော် ရှိနေသေးရင်လည်း တစ်ခုတည်းသော မီးလျှံသည်သာဖြစ်ပါလိမ့်မယ်..
ဓာတ်တော်တွေ ကုန်သွားရင်တော့ မီးလျှံပြတ်စဲသွားပါလိမ့်မယ်..
အဲဒီလို ကြီးမားတဲ့အစွမ်းကိုပြပြီး "ဓာတ်တော်တွေ ကွယ်ပျောက်သွားမှ သာသနာကွယ်ပျောက်သည်" မည်ပါတယ်..
အဲဒီလို မကွယ်ပျောက်သေးသမျှ သာသနာဟာ နောက်ဆုံးမဟုတ်သေးပါဘူး..

(သုတ်မဟာဝါ ဗုဒ္ဓဝံသ ဥပရိပဏ်)

Shared from Ma Ohnmar Shin (FB)