ညီအကိုပင် ဖြစ်သော်လည်း

တခါတုန်းက သေတဗျမြို့မှာ မဟာကာဠ မဇ္ဈိမကာဠ စူလကာဠဆိုတဲ့ ညီအကိုသုံးယောက်ရှိပါတယ်။ အကိုကြီးနဲ့ ညီအငယ်ဆုံးဟာ ကုန်သည်အလုပ်ကို လုပ်ကိုင်ကြပြီး ညီလတ်ကတော့ ညီအကိုတွေ နယ်တကာလှည့်ပြီး ၀ယ်ယူလာတဲ့ ပစ္စည်းတွေကို အိမ်မှာ ဒိုင်ခံရောင်းဝယ်ဖောက်ကားတဲ့ အလုပ်ကို လုပ်ရသတဲ့။ ညီအကိုတွေ စီးပွားရှာရာမှာ တက်ညီလက်ညီ ရှိကြတဲ့သဘောပါ။

တနေ့မှာ အကိုကြီးနှင့် ညီငယ်ဟာ အရောင်းအ၀ယ်ကိစ္စနဲ့ ဘုရားရှင်သီတင်းသုံးရာ သာဝတ္ထိပြည်ကို ရောက်ခဲ့ပါတယ်။ အကိုကြီး မဟာကာဠဟာ သာဝတ္ထိကို ရောက်နေတုန်း ဘုရားရှင်ရဲ့တရားကို နာယူမိပြီး မမြဲတဲ့ သဘောတရားကို ဆင်ခြင်မိသွားသတဲ့။ သူရှာဖွေစုဆောင်းနေသမျှဟာ သေရင်သူ့နောက်ကို ဘာမျှမပါဘူးဆိုတာကို ကောင်းကောင်းသိသွားတဲ့အတွက် ဘုရားရှင်ထံမှာ ရဟန်းဝတ်ခွင့်တောင်းပြီး ရဟန်းပြုသွားခဲ့ပါတော့တယ်။ ညီငယ်လေးဟာ ခရီးသွားရင်း၊ စီးပွားရှာရင်းတန်းလန်းမို့ အကိုကြီးကို ရဟန်းမ၀တ်ဖို့ တားဆီးခဲ့ပေမယ့် ဘယ်လိုမှ တားဆီးလို့မရတဲ့အတွက် အကိုကြီးသွားရာလမ်းကို ငါလည်းလိုက်မဟဲ့ဆိုပြီး သူပါ ရဟန်းလိုက်ဝတ်ခဲ့ပါတော့တယ်။

အကိုကြီးနှင့်ညီငယ် ရဟန်းဝတ်သွားတဲ့သတင်းက သူတို့မြို့ သူတို့မိသားစုကို ပေါက်ကြားရောက်ရှိသွားတဲ့အခါမှာတော့ သူတို့ရဲ့ ဇနီးသည်တွေဟာ ၀မ်းနည်းပက်လက် ဖြစ်ကုန်ကြတော့တာပေါ့။

အကိုကြီး မဟာကာဠဟာ ပင်ကိုယ်စိတ် အားသန်ပြီး ရဟန်းပြုခဲ့တဲ့သူ ဖြစ်တဲ့အတွက် ရဟန်းဘ၀ရောက်တဲ့အချိန်မှာ တရားကို ကြိုးကြိုးစားစား အားထုတ်လိုက်တာဟာ မကြာခင်ကာလမှာပဲ ရဟန္တာအဖြစ်ကို ရောက်ရှိသွားခဲ့ပါတော့တယ်။ ညီငယ်လုပ်တဲ့ စူလကာဠကတော့ နဂိုကတည်းက အကိုကြီးဝတ်လို့ လိုက်ဝတ်ခဲ့သူဆိုတော့ စိတ်ကမပါ။ များမြောင်တဲ့ရဟန်းသိက္ခာပုဒ်တွေကို စိတ်ပျက်ပြီး လူထွက်ဖို့အခွင့်အလမ်းကိုသာ ချောင်းနေပါတော့သတဲ့။ တနေ့မှာတော့ ဘုရားရှင်ဟာ နောက်ပါရဟန်းများနှင့်အတူ ဒေသစာရီကြွဖို့ အကြောင်းဖြစ်လာခဲ့ပါတယ်။ ဘုရားရှင်ရဲ့ ဒေသစာရီခရီးမှာ နောက်ဆုံးကြွရောက်မယ့် မြို့ဟာ ညီအကိုရဟန်းတို့ရဲ့ ဇာတိချက်ကြွေ သေတဗျမြို့ပဲ ဖြစ်ပါတော့တယ်။

မဟာကာဠရဟန်းနဲ့ စူလကာဠရဟန်းတို့ ပါလာတယ်လို့လည်း ကြားရော ဇနီးဟောင်းတွေက ၀မ်းသာအားရ ဖြစ်ကုန်ကြတော့တာပေါ့။ သူတို့က နဂိုကတည်းကမှ ရဟန်းဝတ်တာ သဘောမတူခဲ့ကြသူတွေဆိုတော့ ခင်ပွန်းဟောင်းတွေကို လူဝတ်ပြန်လဲအောင် လုပ်ရမယ်ဆိုပြီး စိတ်ကူးယဉ်ကြတော့တာပါပဲ။ သူတို့စိတ်ကူးတဲ့အတိုင်း ဖြစ်အောင် အစီအစဉ်ကျကျနဲ့ပဲ ဘုရားရှင်နဲ့သံဃာတော်တွေကို ဆွမ်းစားပင့်ဖိတ်ခဲ့ပါတော့သတဲ့။ ဖြစ်ချင်တော့ ဘုရားရှင်နဲ့ ရဟန်းသံဃာတော်တွေအတွက် နေရာထိုင်ခင်း အစီအစဉ် အဆင်ပြေမပြေ ကြိုတင်ကြည့်ရှု နေရာချလုပ်ဆောင်ရတဲ့တာဝန်ကို မြို့ခံဖြစ်တဲ့ စူလကာဠရဟန်းက တာဝန်ကျခဲ့တာနဲ့ ကွက်တိသွားတိုးတော့ပါပဲ။ ဇနီးဟောင်းက ခင်ပွန်းဟောင်းကို လူဝတ်မလဲချင် လဲချင်အောင် မူယာမာယာတွေ ပိုပိုသာသာလုပ်ပြတဲ့အခါမှာတော့ နဂိုကတည်းကမှ စိတ်ကမခိုင်တဲ့ စူလကာဠရဟန်းဟာ ခါးမတို့ခင်က ယားပါတယ်-ဆိုတဲ့ စကားပုံလိုပဲ တခါတည်း လူဝတ်လဲခဲ့တော့တာပေါ့။

စူလကာဠဟာ လူဝတ်လဲပြီးတဲ့အချိန်မှာလည်း မျက်နှာမပူ၊ မရှက်ဘဲ ပျော်ပျော်ရွှင်ရွှင်နဲ့ သံဃာတော်တွေကို ဆွမ်းစားပင့်ဖို့ ကျောင်းကိုရောက်လာခဲ့ပါသတဲ့။ ဘုရားရှင်နဲ့ ရဟန်းသံဃာတော်တွေဟာ ထုံးစံအတိုင်း ပင့်ဖိတ်တဲ့ ဒကာရဲ့အိမ်ကို ဣနြေ္ဒသိက္ခာပြည့်စုံစွာနဲ့ ကြွရောက်ခဲ့ပါတယ်။ နောက်ပါရဟန်းတချို့ထဲက ရဟန်းငယ်တွေကတော့ လူဝတ်လဲသွားတဲ့ စူလကာဠကို အပြစ်တင်ပြောဆိုချင်ကြတာပေါ့။ ဘုရားရှင်ကတော့ ဆွမ်းဘုဉ်းပေး၊ အနုမောဒနာတရားကိုဟောပြီး ပြန်ကြွသွားခဲ့ပါတယ်။

နောက်နေ့မှာတော့ မဟာကာဠရဟန်းရဲ့ ဇနီးဟောင်းက ဆွမ်းစားပင့်ဖိတ်ခဲ့ပြန်ပါတယ်။ ဒီတခါမှာတော့ နေရာထိုင်ခင်း အစီအစဉ် ကြိုတင်သွားရောက်ကြည့်ရတဲ့ကိစ္စကို မဟာကာဠရဟန်း တာဝန်မကျတဲ့အတွက် မဟာကာဠရဟန်းရဲ့ ဇနီးဟောင်းဟာ သူကြိုတင်စိတ်ကူးထားသလိုတော့ ဆွဲဆောင်ဖို့ အခွင့်အရေး မရတော့ဘူးပေါ့။ ဒါပေမယ့် သူက လက်မလျှော့ဘဲ ဘုရားရှင်နဲ့ရဟန်းတွေ ဆွမ်းစားကြွရောက်ပြီး ဆွမ်းဘုဉ်းပေးပြီးသွားတဲ့အခါမှာတော့-

ဇနီးဟောင်း-----အရှင်ဘုရား၊ အရှင်မဟာကာဠဟာ တပည့်တော်တို့ကို တရားဟောဖို့အတွက် နေရစ်ခဲ့မှာဖြစ်ပါတယ်။ အရှင်ဘုရားတို့ အရင်ပြန်ကြွနှင့်ပါဘုရား။

ဗုဒ္ဓဘုရားရှင်ဟာ ဒကာမပြောတဲ့အတိုင်းပဲ မဟာကာဠကို ချန်ခဲ့ပြီး ပြန်ကြွသွားခဲ့ပါတယ်။ ဒီကိစ္စအတွက် ရဟန်းငယ်တွေ အချင်းချင်း တီးတိုးတီးတိုး ပြောကြပြန်တော့တာပေါ့။

ရဟန်းများ-----အရှင်မဟာကာဠကတော့ ကျန်ခဲ့ပြီ။ ဘာတွေဖြစ်ဦးမလဲ မသိဘူး။ ဟုတ်ပါရဲ့ ဒီတခါ အရှင်မဟာကာဠပါ လူထွက်သွားမယ်ဆိုရင် ရဟန်းကောင်းတပါး ဆုံးရှုံးတော့မှာပဲ။

ဘုရားရှင်က ဘာလို့များ ချန်ခဲ့ပါလိမ့်။ တပါတည်း အပါခေါ်ခဲ့ရမှာ

ဘုရားရှင်-----ရဟန်းတို့ သင်တို့စိတ်ထဲမှာ မဟာကာဠကို စူလကာဠလိုပဲ ဖြစ်မယ် ထင်နေကြသလား။

ရဟန်းများ-----ဟုတ်ပါတယ်အရှင်ဘုရား၊ ဒီအရှင်ရဲ့ ဇနီးဟောင်းကလည်း အကြံကြီးပါတယ်ဘုရား။ ဒီအရှင်ကို လူဝတ်လဲချင်အောင် ပြုမူတော့မှာ သေချာပါတယ်ဘုရား။

ဘုရားရှင်-----ရဟန်းတို့ သင်တို့ ဒီလိုမထင်ကြလေနဲ့။ ညီအကိုချင်းပင် ဖြစ်လင့်ကစား တရားဓမ္မကို အမှန်တကယ် ယုံကြည်နားလည်သူနဲ့ နားလည်ချင်ယောင် ဆောင်သူဟာ လွန်စွာကွာခြားပါတယ်။ စူလကာဠဟာ ကမ်းနားသစ်ပင်လိုပဲ။ ကာမဂုဏ်အာရုံတွေနဲ့ ဆွဲဆောင်လိုက်ရုံနဲ့ အလွယ်တကူ ယိမ်းယိုင်ပြိုလဲသွားတယ်။ မဟာကာဠကတော့ ကျောက်တောင်ကြီးနဲ့ ပမာတူပါပေတယ်။ ကာမဂုဏ်အာရုံနှင့် ဘယ်လောက်ပဲ ဆွဲဆောင် ဆွဲဆောင် ဘယ်လိုမှ ပြိုယိုင်လဲစရာအကြောင်း မရှိပေဘူး။

ဘုရားရှင်အမိန့်ရှိတဲ့အတိုင်းပါပဲ၊ တပါးတည်း ကျန်ရစ်ခဲ့တဲ့ မဟာကာဠဟာ ဇနီးဟောင်းရဲ့ ဆွဲဆောင်မှုမျိုးစုံကို စိတ်ဓာတ်သမာဓိ ကြံ့ခိုင်စွာနဲ့ ရှောင်ဖယ်နိုင်ခဲ့ပါတယ်။ ဇနီးဟောင်းဒကာမက ဆွဲဆောင်မှုတွေ ပိုလာချိန်မှာတော့ အရှင်မဟာကာဠဟာ သူ့ရဲ့ဈာန်အဘိညာဉ်တန်ခိုးနဲ့ ကောင်းကင်ကို ပျံတက်ပြီး ကျောင်းတော်ကို ပြန်လည်ကြွရောက်လာခဲ့ပါတော့တယ်။

Posted by "Buddha In My Life"