တို့တစ်တွေ ပြန်ဆုံတဲ့အခါ

   တစ်ခါတုန်းက ဥတ္တရာပထတိုင်းသားတစ်ယောက်ဟာ ခရီးတစ်ခုထွက်ခဲ့ပါတယ်။ ခရီးသွားနေတုန်းမှာ နေကသိပ်ပူတော့ ရေလည်း ဆာလာပါတယ်။ ဒါကြောင့် နီးစပ်ရာသစ်ပင်ရိပ်အောက်ကို ဝင်နားလိုက်ပါတယ်။ သစ်ပင်အောက်မှာ သူ့လိုပဲ သာဝတ္ထိပြည်သား လူစိမ်းတစ်ယောက်ကလည်း ကွမ်းဝါးနေရင်း နေပူခိုနေပါတယ်။ ဒီတော့ ဥတ္တရာပထတိုင်းသားက ကြိုရောက်နေတဲ့လူစိမ်းကို ရေတောင်းလိုက်ပါတယ်။

… “ မိတ်ဆွေရယ် ရေလေးဘာလေးမပါဘူးလား၊ ပါရင်နည်းနည်းလောက်ပေးစမ်းပါ၊ ရေသိပ်ဆာနေလို့ပါ ”

... “ မပါဘူး…”  

... “ ဒါဖြစ်ရင်လည်းမိတ်ဆွေရယ်၊ ရေဆာလွန်းလို့ ကွမ်းလေးတစ်ယာလောက်ပေးပါ ”

…“ အိုး …... ဒီအတိုင်းတော့ ဘယ်ရမှာလဲ၊ လေးအသပြာပေးရမယ်”

... “ ရပါတယ်၊ လေးအသပြာပေးပါ့မယ် ”  ပြောပြီးလေးအသပြာကို ထုတ်ပေးလိုက်ပါတယ်။ ဒီတော့ ဥတ္တရာပထတိုင်းသားက ရေဆာပြေအဖြစ် ကွမ်းကိုဝါးပါတော့တယ်။

    တကယ်တော့ ကွမ်းတစ်ယာဟာ လေးအသပြာ မတန်ပါဘူး၊ လိုနေမှန်းသိလို့ ပုံမှန်ဈေးထက် အဆများစွာတင်ရောင်းလိုက်တာပါ။ အမောပြောတော့ ကိုယ့်ခရီးကို ဆက်ခဲ့ကြပါတယ်။ ဒီလိုနဲ့ နှစ်ကာလတွေ ကြာသွားရောဆိုပဲ ဆိုပါတော့။

     တစ်နေ့သောအခါမှာတော့ ပင်လယ်ပြင်မှာခရီးထွက်ရင်း သူတို့နှစ်ဦးဟာ သင်္ဘောတစ်စီးမှာ ပြန်ဆုံကြပြန်ပါတယ်။

     တစ်နေရာအရောက်မှာတော့ စီးလာတဲ့သင်္ဘောက မှောက်သွားပါလေရော။ ခရီးသည်တွေဟာ ပင်လယ်ထဲမှာ ယက်ကန်ယက်ကန်နဲ့ ကူးနေကြပါတယ်။ ဥတ္တရာပထတိုင်းသားကတော့ ကံကောင်းစွာနဲ့ ပျဉ်ချပ်တစ်ခုကို ရလိုက်ပါတယ်။

     ရလာတဲ့ပျဉ်ချပ်နဲ့ကူးရင်း သူနဲ့ခပ်လှမ်းလှမ်းမှာ ယက်ကန်ယက်ကန်နဲ့ ရေထဲနစ်လုနီးပါးဖြစ်နေတဲ့ လူတစ်ယောက်ကိုတွေ့လိုက်ပါတယ်။ သေချာကြည့်လိုက်တော့ တစ်ချိန်က သူ့ကို ကွမ်းတစ်ယာကို လေးအသပြာနဲ့ ရောင်းဖူးခဲ့တဲ့သူပါ။

     ဒီတော့ ဥတ္တရာပထတိုင်းသားက “ ဒီမိတ်ဆွေဟာ ငါရေငတ်နေတုန်းက ကွမ်းတစ်ရာရောင်းဖူးတယ်။ ကျေးဇူးရှိခဲ့ဖူးတဲ့ မိတ်ဆွေပဲ ”….. ဆိုပြီး သူ့ရဲ့ပျဉ်ချပ်ကို ထိုးပေးလိုက်ပါတော့တယ်။

    သီဟိုဠ် ဝတ္တုလေးတစ်ပုဒ်ဖြစ်ပါတယ်။ ရသဝါဟိနီကျမ်းကပါ။ ရဝေနွယ်(အင်းမ) ရေးသားထားသော “ တို့တစ်တွေ ပြန်ဆုံတဲ့အခါ ” ခေါင်းစဉ်ရှိစာအုပ်မှ ကူးယူတင်ပြခြင်းဖြစ်ပါသည်။

[Reference: www.forverfriends.ning.com]